भांगरभूंय | प्रतिनिधी
पणजी म्हापालिकेक कॅसिनो जायरातींतल्यान एकूय पयसो मेळना
भांगरभूंय । प्रतिनिधी
पणजी : पणजे शारांत रस्त्या कुशीच्या बॅरीकेड्सांचेर कॅसिनोच्यो जायराती दिश्टी पडटात. ह्यो जायराती बेकायदा आसून तांकां पणजी म्हापालिका वा पुलिसांनी लेगीत परवाने दिवंक ना. तशेंच पणजी म्हापालिकेक ह्या जायरातींतल्यान एकूय पयसो मेळना. म्हायती हक्क कायद्या खाला (आरटीआय) पणजेकार अगेन्स्ट कॅसिनो हांकां ही म्हायती मेळ्या. ह्या बेकायदा जायरातींचेर कारवाय करपाची मागणी पणजेकार अगेन्स्ट कॅसिनोन केल्या.
पणजेकार अगेन्स्ट कॅसिनोच्या वांगड्यांनी पत्रकारांक ही म्हायती दिली. बॅरीकेडावेल्यो जायराती सप्तकां भरांत काडून ओडोवच्यो. ह्यो जायराती सरकारी यंत्रणाक काडपाक शक्य ना जाल्यार जायराती काडपाक पणजेकार म्हापालिकेक मजत करपाक तयार आसा, अशें सबिना मार्टिंन्स हिणें सांगलें. ह्या वेळार पॅट्रिशिया पिंटो आनी हेर वांगडी हाजीर आशिल्लें.
जायराती खातीर सगळ्यांक नेमा प्रमाण शुल्क फारीक करचे पडटा. जायराती वा होर्डिंग लावपाक परवानो घेवचो पडटा. परवानो नासताना कॅसिनोच्यो जायराती बॅरीकेडाचेर कित्याक आसा? हांचेर कारवाय कित्याक जाय ना, असो प्रस्न सबिना मार्टिन्स हिणें केलो.
पणजी म्हापालिके उपरांत येरादारी पुलिसां कडेन लेगीत परवान्यां विशीं आमी आरटीआयच्या आदारान खबर काडली. येरादारी पुलिसांनी लेगीत जायरातींक परवाने दिवंक ना. परवानो नासतना आनी कसलीच येणावळ ये नासताना फुकट कॅसिनोच्यो जायराती कित्याक? अप्रत्यक्षरित्या कांय जाणांक येणावळ मेळपाचो दुबाव हातुंतल्यान दिसता, अशें पणजेकार अगेन्स्ट कॅसिनोन म्हणलां.
तंबाखूच्या पदार्थांची जायरात करपाक बंदी आसा. कॅसिनो वा जुगाराची जायरात करपाचेर लेगीत बंदी आसपाक जाय. पणजी म्हापालिका तशेंच सरकारान लक्ष घालून ह्यो जायराती काडच्यो अशी मागणी पणजेकार अगेन्स्ट कॅसिनो संघटणेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
