भांगरभूंय | प्रतिनिधी
खबरां संस्थाः संयुक्त राश्ट्रांन बुधवारा वर्ल्ड हॅपीनेस रिपोर्ट 2026 जाहीर केलो. तातूंत फिनलंड सेगीत णववे खेपे संवसारांतलो सगळ्यांत सुखी देश म्हूण जाहीर जालां. 147 देशांचे वळेरेंत पाकिस्तानाचो क्रमांक 104वो आसा. जाल्यार भारत 116व्या क्रमांकाचेर आसा. 2025 वर्सा भारताची क्रमवारी 118वे सुवातेर आशिल्ली. अडेज वर्सां झुजांत आशिल्ल्या इझ्राएलाक संवसारांतलो आठवो सुखी देश म्हूण जाहीर केला.
हे वळेरेंत सगल्यांत सकयल संघर्शाचो परिणाम जाल्ले देश आसात. अफगाणिस्तान परतून सगळ्यांत उणो सुखी देश आसून ताचे उपरांत सिएरा लिओन आनी मलावी आसात. अमेरिका 23वे, कॅनडा 25वे आनी ब्रिटन 29वे सुवातेर आसा.
फिनलंड सारक्या देशांचें सुखाचे कारण बरी अर्थीक परिस्थिती, साधनसंपत्तीचें समतोल वांटप, घटमूट कल्याणकारी वेवस्था आनी बरो जिणेचो दर्जो आसा. ह्या अहवाला प्रमाण सोशल मिडियाचो चड वापराक लागून जायत्या देशांतल्या तरणाट्यांच्या सुखाचेर आनी मानसीक भलायकेचेर वायट परिणाम जावपाक लागला.
वर्ल्ड हॅपीनेस रिपोर्टांतले टॉप 10 देश
फिनलंड, आयसलँड, डेन्मार्क, कोस्टा रिका, स्वीडन, नॉर्वे, नेदरलँड्स, इस्रायल, लक्झेंबर्ग आनी स्वित्झर्लंड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
