भांगरभूंय | प्रतिनिधी
आपानूय जाहीर केलो उमेदवार
पणजीः भाजपान फोंडेंच्या पोटवेंचणुके खातीर सर्गेस्त रवी नायक हांचो पूत रितेश नायक हांकां उमेदवारी दिल्या. देखून आतां रितेश आनी केतन हांचे मदीं थेट लढत जातली. मजगतीं आम आदमी पक्षानूय उमेदवार जाहीर केलो. आम आदमी पक्षा वतीन गीतेश नायक हांकां उमेदवारी दिल्या.
रितेश नायक आनी विश्वनाथ दळवी हीं दोन नांवां प्रदेश भाजपान उमेदवारी खातीर शिफारस केल्ली. तातूंतल्यान रितेशाचें नांव अपेक्षा प्रमाण जाहीर जालें. काँग्रेसीन डॉ. केतन भाटीकार हांची उमेदवारी पयलींच जाहीर केल्या.
फोंडें मतदारसंघा खातीर मतदान 9 एप्रीलाक जातलें. उमेदवारी अर्ज सादर करपाची निमाणी तारीख 23 मार्च. आम आदमी पक्षान फोंडें पोटवेंचणुकेची तयारी पयलींच सुरू केल्ली. दोन दिसां आदीं आप पक्षांत आयिल्ल्या गीतेश नायक हांची उमेदवारी आपान जाहीर केल्या. आप वेंचणुकेच्या मळार आयिल्ल्यान विरोधी पक्षांची युती सोंपल्या. उमेदवार उबो करपा संबंदी आतां आरजी कितें भुमिका घेतले, हाचे कडेन सगल्यांचे लक्ष आसा.
एसआयआर उपरांत 4 हजारां परस चड मतां उणीं जाल्यांन समीकरणांत बदल जाला. आपान परतून उमेदवार उबो केल्ल्यान भाजपा विरोधी मतां विभागतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
