भांगरभूंय | प्रतिनिधी
मुक्ती उपरांत 14 वेंचणुकांतल्यान 6 फावटीं सर्गेस्त रवी जैतिवंत
पणजीः वेंचणुकेची तारीख जाहीर जाले उपरांत काँग्रेसीचो उमेदवारूय जाहीर जालो, देखून फोंडें पोटवेंचणुकेची लढाय सुरू जाल्या. भाजपाचो उमेदवार जाहीर जाले उपरांत चित्र स्पश्ट जातलें. गोंयचे लाडके पात्रांव आशिल्ले सर्गेस्त रवी हांकां फोंडें कितलो तेंको आशिल्लो हें आयज मेरेनचे निकाल पळयल्यार सहजपणान लक्षांत येता.
1961 वर्सा गोंय पोर्तुगेज सत्तेपसून मुक्त जालें. गोंय मुक्त जाले उपरांत 1963 वर्सा पयली विधानसभा वेंचणूक जाली. आयज मेरेन फोंडें मतदारसंघांत 14 विधानसभा वेंचणुको जाल्यात. आतां जावपी पोटवेंचणूक पंदरावी आसा. 14 वेंचणुकां मदीं सगल्यांत चड 6 फावटीं सर्गेस्त रवी हांणी जैत मेळयलां.
सगल्यांत पयली 1984 वर्सा मगोच्या उमेदवारीचेर फोंडें मतदारसंघांतल्यान सर्गेस्त रवी नायक जैतिवंत जाल्लें. ते उपरांत 1989 वर्साचे विधानसभा वेंचणुकेंत तांणी मडकय मतदारसंघांतल्यान लढो दिलो. मगोतल्यान काँग्रेसींत प्रवेश केले उपरांत ते राज्याचे मुख्यमंत्री जालें. 1999, 2002 आनी 2007 अशा सेगीत तीन विधानसभा वेंचणुकांनी तांणी फोंडें मतदारसंघांतल्यान जैत मेळयलें. पूण 2012 वर्साचे विधानसभा वेंचणुकेंत तांकां मगोचे लवू मामेलदार हांणी हारयले. हाचे उपरांत 2017 वर्साचे वेंचणुकेंत तांणी फोंडें मतदारसंघांतल्यान परतून जैत मेळयलें. निमाणे खेपे 2022 वर्साचे वेंचणुकेंत भाजपाच्या उमेदवारीचेर फोंडें तांकां जैत मेळ्ळें. हाचे आदीं मगोचे स्व. रोहिदास नायक आनी स्व. शिवदास वेरेकार हांणी फोंडें दरेकीं दोन फावटीं जैत मेळयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
