भांगरभूंय | प्रतिनिधी
पटलाचेर आयिल्ल्या 1332 प्रस्नां मदले विरोधकांचें 783 प्रस्न
भांगरभूंय । प्रतिनिधी
पणजी : गोंय विधानसभेचें अर्थसंकल्पी अधिवेशन 14 दीस चलपा बदला 7 दिसूच चल्लें. पोटवेंचणुकेच्या आचारसंहितेक लागून अधिवेशन मुजती पयली स्थगित केलें. 7 दिसांच्या कार्यकाळांत पटलाचेर आयिल्ल्या 1332 प्रस्नां मदले 783 प्रस्न विरोधी आमदारांचे आशिल्लें. हातूंत विरोधी पक्ष फुडारी युरी आलेमांव हांचे सगळ्यांत चड 120 प्रस्न आसा. हातूंत तारांकीत आनी अतारांकीत अशा दोनूय प्रस्नांचो आस्पाव आसा.
अर्थसंकल्पी अधिवेशन 6 मार्चाक सुरू जाल्लें. मुख्यमंत्री डॉ. प्रमोद सावंत हांणी पयलेच दिसा राज्याचो अर्थसंकल्प सादर केलो. फोंडें पोटवेंचणुकेची घोशणा आयतारा 15 मार्चाक जाली. आचारसंहिता लागू जाल्या उपरांत 16 मार्चाक अधिवेशन स्थगित केलें.
सात दिसांच्या कामकाजात जे प्रश्न पटलाचेर आयिल्लें ते मदले 60 टक्के प्रस्न हे विरोधी आमदारांचेच आशिल्ले. विरोधी आमदारांचे 783 जाल्यार सत्ताधारी आमदारांचे 549 प्रस्न पटलाचेर आयलें.
विरोधी आमदारां मदीं युरी आलेमांव हांच्या 120 प्रस्नाक जापो मेळ्ळ्यो. काँग्रेसीचे अॅड. कार्लुस फेरेरा हांचे 97 जाल्यार एल्टन डिकोस्ता हांचे 118 प्रस्न पटलाचेर आयलें.
आम आदमी पक्षाचे क्रुज सिल्वा हांचे 110 जाल्यार वेंझी व्हिएगस हांच्या 108 प्रस्नांक जापो मेळ्ळ्यो. आरजीचे विरेश बोरकार हांच्या 118 जाल्यार गोवा फॉरवर्डाचे विजय सरदेसाय हांच्या 112 प्रस्नाक जापो मेळ्ळ्यो. युरी आलेमांव हांचे उपरांत विरेश बोरकार हांचे 118 प्रस्न पटलाचेर आयलें. सात दिसांच्या अधिवेशनांत निमाणे दिस प्रस्नोत्तराकूच सभाघराचे कामकाज स्थगित करचे पडले. हाका लागून खूब उण्या तारांकीत प्रस्नांचेर चर्चा जाली.
अधिवेशनात आयिल्लें विरोधी आमदारांचे प्रस्न
आमदार प्रस्न
युरी आलेमांव 120
कार्लुस फेरेरा 97
एल्टन डिकोस्ता 118
वेंझी व्हिएगस 108
क्रुज सिल्वा 110
विजय सरदेसाय 112
विरेश बोरकार 118
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
