भांगरभूंय | प्रतिनिधी
म्हापशेंः नुस्तें आनी चिकन-मटण मार्केट इमारतीच्या छप्पराचेर आशिल्ल्या उदकाच्या टांकयांक उजो लागून चार मदल्यो तीन टांकयो उज्यांत लासल्यो. हातूंत म्हापशें पालिकेचें सुमार 20 हजारांचें लुकसाण जालें.
बधवारा सकाळीं साडे पांच वरांचे सुमाराक ही घडणूक घडली. म्हपशें बाजारांतल्या नुस्तें आनी चिकन-मटण मार्केट प्रकल्प इमारतीचें छप्पराचेर पालिकेन गोंय शार उदरगत एजन्सी (सुडा) वतीन पत्र्यांचें कव्हर घालपाचें काम करता. ते खातीर गॅस वेल्डिंगाचो उपेग करतात.
इमारतींत उदका पुरवण करपा खातीर छप्पराचेर 10 हजार लिटराची तांक आशिल्ल्यो चार उदकाच्यो टांकयो बसयल्ल्यो. फांतोडेर अचकीत ह्या टांकयांक उजो लागलो. ह्यो प्लास्टीक टांकयो आशिल्ल्यान तांकां लागिल्लो उजो पातळ्ळो. उपरांत बाजारांत आयिल्ल्या विक्रेत्यांनी उजो पालोवपी दळाक म्हायती दिली.
म्हापशें उजो पालोवपी दळाक म्हायती मेळ्ळे बरोबर उजो पालोवपी दळाचे कर्मचारी थंय धांवले. उजो पालोवपी दळाचे उपअधिकारी प्रकाश कन्नायक हांच्या फुडारपणा खाला जवानांनी तीन माळयेच्या इमारतीच्या छप्पराचेर चडून उजो नियंत्रणांत हाडलो. पूण हाचे आदीं एक टांकी पुरायपणान लासून गोबर जाल्ली. जाल्यार हेर दोन टांकयांचेंय व्हड लुकसाण जालां. तीन टांकयो जळिल्ल्यान पालिकेचे सुमार 20 हजारांचें लुकसाण जालां.
मजगतीं, उज्याचें कारण स्पश्ट जावंक ना. कारण वेल्डिंगाचें काम बंद आशिल्लें. ते भयर इमारतीच्या छप्पराच्या दाराचेरूय कुलूप लायिल्लें. म्हापशें पुलीस आनी पालिका अधिकारी हे घडणुकेची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
