फोंडें पोटवेंचणूकः प्रशासन तयार, जिल्हो दंडाधिकाऱ्यांनी घेतलो नियाळ

भांगरभूंय | प्रतिनिधी

मडगांवः दक्षीण गोंय जिल्होधिकारी आनी जिल्लो वेंचणूक अधिकारी एग्ना क्लिटस हांणी नोडल अधिकारी आनी संपर्क अधिकारी हांचे कडेन बसका घेतली. 9 एप्रीलाक जावपी फोंडें पोटवेंचणुकेचे फाटभुंयेर वेंचणुकेचे तयारेचो नियाळ घेवन गरजेची तयारी करपाची सुचोवणी दिली.
हे बसकेंत मुखेलपणान मतदान कर्मचाऱ्यांचें रँडमायझेशन आनी वेगवेगळ्या विभागा मदल्या समन्वयाचेर भर दिलो. बसके उपरांत म्हायती दितना क्लिटस हांणी सांगलें, वेंचणुकेची तयारी आनी मतदान कर्मचाऱ्यांच्या सहभागाचेर सविस्तर चर्चा जाली. तशेंच लॉजिस्टिक आनी आंतरविभागीय समन्वयाचे प्रस्न हाताळपा वांगडाच केंद्रीय वेंचणूक आयोगान जारी केल्ल्या मार्गदर्शक तत्वांक खरपणान पाळो दिवपाचेर भर दिला.
वेंचणूक प्रक्रिये संबंदीत वेगवेगळ्या जापसालदारक्यां खातीर नोडल आनी सहाय्यक नोडल अधिकाऱ्यांची वळेरी तयार केल्या. हातूंत कायदो आनी सुवेवस्था, मनीसबळ वेवस्थापन, ईव्हीएम वेवस्थापन आनी मीडिया प्रमाणन अशा कामां खातीर नेमिल्ले वेगवेगळे अधिकारी आसपावीत आसात. पोटवेंचणूक जाहीर जाले पसून ह्या सगल्या अधिकाऱ्यांक जिल्होधिकारी कार्यालयांत अहवाल दिवपाक सांगलां.
तशेंच संबंदीत उपक्रमां खातीर जाय आशिल्ल्या पंगड वांगड्यांची निवड करुन तांची म्हायती कार्यालयांत सादर करपाचे निर्देश अधिकाऱ्यांक दिल्यात. वेंचणूक आयोगाच्या वेळापत्रका प्रमाण उमेदवारी अर्ज दाखल करपाची निमाणी तारीक 23 मार्च आनी मतदान 9 एप्रीलाक जातलें. जाल्यार वेंचणुकेचो निकाल 4 मे दिसा जाहीर जातलो.