भांगरभूंय | प्रतिनिधी
इंदूर, खबरां संस्थाः मध्य प्रदेशांतल्या इंदूर शारांत बुधवारा सकाळीं व्हड प्रमाणांत भिरांकूळ उजो लागलो. हातूंत सात जाणांक मरण आयलें.
मेळिल्ले म्हायती प्रमाण, बृजेश्वरी अॅनेक्स ह्या निवासी वाठारांतल्या तीन माळयेच्या इमारतींत सकाळीं सुमार चार वरांचेर उजो लागलो. घराच्या भायर चार्जिंगांक लायिल्ल्या इलेक्ट्रीक गाडयेंतल्यान उजो लागला आसूं येता असो अदमास आसा.
इंदूर पुलीस आयुक्त संतोष कुमार सिंग हांणी सांगलें, हे घडणुकेची म्हायती मेळ्ळे उपरांत उजो पालोवपी दळ घडणूक सुवातेर पावलो आनी उजो नियंत्रणांत हाडलो. हे दुर्घटनेत तिगांक वाटावपाक उजो पालोवपी दळाक येस आयले जाल्यार, सात जाणांक मरण आयलें.
उजो इतलो नेटान पातळ्ळो की पुराय तीन माळयेचें घर रोखडेच लासून गोबर जालें. ही इमारत वेवसायीक मनोज पुगालियाची आशिल्ल्याचे कळटा. 15 एलपीजी गॅस सिलिंडर आनी कांय रसायनां त्या सुवातेर सांठोवन दवरिल्लीं मेळ्ळीं, जाका लागून उजो वाडलो आनी पाताळ्ळो अशें म्हणटात.
हे घडणुकेक लागून वाठारांत भंय निर्माण जाला. उज्याचें खरें कारण सोदून काडपा खातीर फुडली चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
