भांगरभूंय | प्रतिनिधी
१५ मदल्या फकत २ खासगी प्रस्तावांचेर जाली चर्चा
पणजी : पोटवेंचणुकेच्या आचारसंहितेक लागून सोमारा मुजती पयलींच अर्थसंकल्पीय अधिवेशन गुठळायिल्ल्याची घोशणा सभापती गणेश गांवकार हांणी केली आनी विरोधी आमदार तशेंच जनतेची कांय प्रमाणांत निरशेवणी जाली. ६ एप्रील ते २७ एप्रील मेरेन १४ दिसांच्या कामकाजाचें हें अधिवेशन आशिल्लें. सात दीस चलिल्ल्या ह्या अधिवेशनांत आमदारांनी विचारिल्ल्या ४५ टक्के प्रस्न सभाघराच्या पटलाचेर आयले. म्हणजे तारांकीत आनी अतारांकीत मेळून ४५ टक्के प्रस्नाच्यो लेखी जापो आमदारांक मेळ्ळ्यो. तारांकीत आनी अतारांकीत मेळोन आमदारांचे २९३१ प्रस्न आयिल्ले, हातुंतल्यो १३५२ प्रस्नांच्यो जापो मेळ्ळ्यात. हातूंत तारांकीत आनी अतारांकीत प्रस्नांचो आस्पाव आसा.
म्हळ्यार आमदारांनी विचारिल्ल्या चडशा प्रस्नांच्यो (५५ टक्के) जापो आमदारांक मेळ्ळ्योच नात. तारांकीत प्रस्नांचेर सभाघरांत चर्चा जाता. निमाणें दिसा म्हळ्यार १६ मार्चाक प्रस्नोत्तरावेळारूच कामकाज तहकूब केल्ल्यान एकाय प्रस्नाचेर चर्चा जाली ना. तशेंच शुक्रारा लेगीत प्रस्नोत्तरावेळार कामकाज तहकूब केल्ल्यान सभाघराचो बरोच वेळ फुकट गेलो.
अधिवेशना खातीर आमदारां कडल्यान ५८३ तारांकीत जाल्यार २३४८ अतारांकीत मेळोन २९३१ प्रस्न आयिल्ले. हाचे मदल्या २५३ तारांकीत आनी १३३२ अतारांकीत मेळोन १३५२ प्रस्नांच्यो जापो सभाघराच्या पटलाचेर सादर जाल्यो.
७ दिसांच्या कामकाजांत ८ लक्षवेधी सुचवणेचेर चर्चा जावन मंत्र्यांनी जापो दिल्यो. अधिवेशना खातीर आमदारां कडल्यान १५ खासगी प्रस्ताव दाखल जाल्ले. हाचे मदले फकत २ खासगी प्रस्ताव चर्चेक आयले. शुक्रारच्या (१३ मार्च) कामकाजा वेळार २ खासगी प्रस्ताव फुडें धुकलिल्ले. मात ते चर्चेक आयले ना.
सरकारी विधेयकाचो विचार केलो जाल्यार एकूय विधेयक सादर जालें ना. १६ मार्चाच्या कामकाजांत नगरपालिका दुरूस्ती विधेयकाचो आस्पाव अजेंड्यात आशिल्लो. मात ताचे पयली कामकाज तहकूब जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
