भांगरभूंय | प्रतिनिधी
कॉंग्रेसीचे उपाध्यक्ष सुनिल कवठणकार हांचो आरोप
पणजीः फोंडें पोट वेचणुकेच्या आचारसंहितेचें निमीत करून मुख्यमंत्र्यान विधानसभेचें कामकाज कमी करून सरकारा कडल्यान जापसालदाराकी मागपाच्या हक्का पासत गोंयकारांक ताटळत दवरलें. विरोधकां कडल्यान उक्तें पडपाच्या भंयाक लागून सरकारान विधानसभेचें अधिवेशन कवळ्ळें, असो आरोप गोंय प्रदेश कॉंग्रेशीचे उपाध्यक्ष सुनिल कवठणकार हांणी केलो.
कॉंग्रेस हावसांत आपयल्ले पत्रकार परिशदेक ते उलयताले. तशेंच कॉंग्रेस उपाध्यक्ष तुलियो डिसोझा हजर आशिल्ले.
अधिवेशन उणें करून सरकारान गोंयकारांचें लुकसाण केलां. आमचे आमदार लोकहिताचे प्रस्न हाजीर करताले, पूण ह्या सरकारान चर्चेची गळचेपी करप पसंत केलें. विरोधी पक्ष फुडारी युरी आलेमाव, केपेंचे आमदार एल्टन डिकॉस्टा आनी हळदणचे आमदार कार्लुस फेरेरा हांणी सरकाराक पुराय उक्ताडार हाडिल्लें, असो दावो कवठणकार हांणी केलो.
महाराष्ट्रांत आनी कर्नाटकांत पोट वेचणुको चालू आसतना थंयसर अधिवेशनां कवळूंक नात. जर विधेयकां मांडल्लीं जाल्यार कलम ३९ (अ) सकयल भाजपाची लुटमार बंद जावपाची. देखून तांणी अधिवेशन कवळ्ळें आनी अर्थसंकल्प बेकायदेशीर रितीन संमत केलो, असो आरोप कवठणकार हांणी केलो.
सरकार सगल्या पांवड्यार अपेसी थारलां, खास करून अर्थीक नियोजनांत. जानेवारी २०२६ मेरेन गोंयचें रीण ३५,३१२ कोटी रुपयां वयर पावलां आनी तें फेडपाची कसलीच तजवीज सरकारा कडेन ना. एफआरबीएम मार्गदर्शक तत्वां प्रमाण रीण जीएसडीपीच्या २२-२५% परस चड आसूंक फावना, पूण गोंयचें प्रमाण ३४-५३% वयर पावलां. गोंयचे अर्थवेवस्थे खातीर हें घातक आसा, असो आरोप तुलियो डिसोझा हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
