भांगरभूंय | प्रतिनिधी
आरजीपीचे अध्यक्ष मनोज परब हांचो सरकाराक प्रस्न
पणजीः भाजपा सरकाराच्या हेर राज्यांनी पोटवेंचणूक जाहीर जावन लेगीत विधानसभेचें कामकाज सुरळीत चालू आसा. मात भाजप सरकारान ३० हजार कोटींचो अर्थसंकल्प चर्चेक घेनासतना, तो संमत करून अधिवेशन काबार केलें. हाचे वेल्यान दिसून येता २०२७ चे वेंचणुकेचेर हाचो परिणाम जायत म्हण सरकार भियेलां, असो आरोप रेव्ह्युलेशनरी गोवन्स पक्षाचे अध्यक्ष मनोज परब हांणी केलो.
पणजे आपयिल्ले पत्रकार परिशदेंत मनोज परब उलयताले. ह्या वेळार सांत आंन्द्रेचे आमदार विरेश बोरकार आनी आरजीपीचे भांडारी अजय खोलकार हजर आशिल्ले.
महाराष्ट्रांत दोन मतदारसंघांत पोटवेंचणूक जारी जाल्या. तरी लेगीत तांचें अर्थसंकल्पीय अधिवेशन चालूच आसा. त्रिपुरा पोटवेंचणूक जाहीर जाले उपरांत मुख्यमंत्र्यान अर्थसंकल्प वाचून दाखयलो. गुजराताची विधानसभा चालू आसा. थंय मुख्यमंत्री हे भाजपाचेच आसात. मात गोंयचें अधिवेशन गुठलावपाक मुख्यमंत्री डॉ. प्रमोद सावंत हांकां कोणाचो भंय आसलो, असो प्रस्न परब हांणी केलो.
ही वेंचणूक एका मतदारसंघा पुरती मर्यादीत आसा. ह्या मतदारंसघा खातीर कसलेंच आस्वासन दिनासतना वा नवी येवजण हाडिनासतना दुसर्या राज्यां भशेन अधिवेशन चलोवप हें सरकाराक करप शक्य आसलें. विधानसभेंत कितलींशींच वर्सां जालीं स्वताक म्हालगडे राजकारणी म्हूण सत्ताधारी आनी विरोधी आमदारांनी हे विशीं अभ्यास करून दुसर्या राज्यांनी अधिवेशन चलता हें दाखोवन दिवपाची गरज आसली, अशें परब हांणी म्हणलें.
हाचे वेल्यान दिसून येता की हें भाजपाचें सरकार फाटीं पडलां आनी फुडले १५ दीस हें अधिवेशन जर चलिल्लें जाल्यार भाजप उक्ताडार येवपाची आनी हाचो परिणाम फोंडें पोटवेंचणुकेचेर आनी २०२७ विधानसभा वेंचणुकेचेर पडपाचो, असो दावो परब हांणी केलो.
इतिहासांत पयलेच खेपे आमी खाजगी विधेयका भायरायल्ल्याची घडणूक घडिल्ल्याचो आरोप, सांत आंद्रेचे आमदार विरेश बोरकार हांणी केलो.
ह्या खाजगी विधिमंडळ थारावांत सगल्यांत चड विधेयकां हांवें घेतिल्लीं. गोंयची वळख, सुवात आनी उदक राखपा खातीर हीं विधेयकां आशिल्लीं. ह्या विधेयकां वरवीं ३९ (अ) कलम रद्द करपाचो आमचो हेतू आसलो आनी ल्हान चर्चा घेवपाचे आमकां आस्वासन दिल्ले. सरकाराकडेन भौवमत आसलें ते भायर मारपाक शकताले. मात तांणी ते चर्चेक लेगीत हाडूंक ना, अशी टिका बोरकार हांणी केली.
हें अधिवेशन गुठलावन सरकारान गोंयकारांचेर अन्याय केला. चर्चा करिनासतना अर्थसंकल्प मंजुर करप हें एक कायद्याचें उल्लंघन जावन आसा. तशेंच मंजुरी वेळार भाजपाचे सत्तेंत आशिल्ले १७ आमदार गैरहजर आशिल्ले आनी सरकारान पांच मिनटां भितर ताकतिकेन कामकाज सोपयलें, अशें बोरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
