भांगरभूंय | प्रतिनिधी
ब्रिस्बेन : इराणाच्या बायलांच्या फुटबॉल पंगडातल्या दोन खेळगड्यांनी ऑस्ट्रेलियांत आलाशिरो घेवन नव्या जिविताक सुरवात केल्या. तांणी थळाव्या ए लीग क्लबा कडेन प्रशिक्षण सुरू केलां.
मिडफिल्डर ३३ वर्सांचे फातेमा पसंदिदेह (Fatemeh Pasandideh) आनी डिफेंडर तेहफे रमझानियझादेह (Tefeh Ramezanizadeh) ह्या दोगांयनी ऑस्ट्रेलियेंत रावपाचो निर्णय घेतलो. त्यो दोगीय सात वांगड्यांच्या गटांत आशिल्ल्यो. बायलां आशियाई कप सर्ती खातीर ऑस्ट्रेलियेंत आयले उपरांत परतल्यार छळ जावपाचो भंय आशिल्ल्यान तांकां आॅस्ट्रेलियेन मानवतावादी व्हिसा दिला. गोल्ड कोस्टाचेर पयले मॅची पयलीं इराणी राष्ट्रगीत गावपाक न्हयकार दिल्ल्यान तांचे सुरक्षे विशीं हुस्को निर्माण जाला. उपरांत इराणी सराकारी प्रसारमाध्यमांनी तांकां ‘झुजाच्या काळांतले देशद्रोही’ अशें म्हणिल्ले. त्याच वेळार अमेरिकेच्या जोड संस्थानांनी आनी इझ्राएलान इराणाचेर हवाई हल्लो केलो तेन्ना परिस्थिती चड ताणाची जाली.
ह्या पंगडाच्या पांच वांगड्यांनी आपलें मत बदलून ऑस्ट्रेलियेंत आलाशिरो न्हयकारून घरा परतपाचें थारायलें. मात ही दोगजाणां रावलीं.
मजगतीं, क्वीन्सलँड ए लीग क्लब ब्रिस्बेन रोअर हांणी सोशल मिडियाचेर पसांदीदे आनी रमेझानिजादे हांणी सोमारा आपल्या बायलां पंगडा वांगडा प्रशिक्षण सत्रांत वांटो घेतिल्ल्याचें जाहीर केलें. क्लबाचो मुखेल कार्यकारी काझ पटाफ्तान हांणी ह्या दोगांय खेळगड्यांक येवकार दिलो.
मेजानिझादेह (३३) हांणी इंस्टाग्रामाचेर सगल्यांचे उपकार मानले, जाल्यार पसंदिदेह (२१) हांणें फिफाचे मुखेल फुटबॉल अधिकारी जिल एलीस हांचे वांगडचो फोटो शेअर करून ‘सगलें सारकें जातले’ असो कंमेंट केला.
मजगतीं, उरिल्ल्या इराणी पंगडान मलेशिया मार्गान इराणांत परतपाचो प्रवास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
