भांगरभूंय | प्रतिनिधी
सी फॉर्म भरूंक नाशिल्ल्यान 26 जाणांचेर कारवाय
पणजीः गोंयांत फाटल्या स वर्सांत 8.82 लाख विदेशी नागरीक गोंयांत रावन गेल्यात. हातूंतले चडशे युके आनी रशियन नागरिकांचो आस्पाव आसा. इतले मजगतीं, ह्या विदेशी नागरिकांक आलाशिरो दितना सक्तीचे सी फॉर्म भरूंक नाशिल्ल्याच्या आरोपा खाला 26 जाणांचेर कारवाय जाल्या, अशी म्हायती मुख्यमंत्री डॉ. प्रमोद सावंत हांणी लेखी जापेंत दिल्या.
मांद्रेंचे आमदार जीत आरोलकार हांणी विधानसभेच्या पटलार विचारिल्ल्या प्रस्नाक लेखी जापेंत गृह मंत्री तशेंच मुख्यमंत्री डॉ. प्रमोद सावंत हांणी सी फोर्माची म्हायती दिली.
सी फॉर्मा वरवीं मेळिल्ले म्हायती प्रमाण वर्स 2022 ते 2026 ते आतां मेरेन 8.82 लाख विदेशी नागरीक गोंयांत राबितो करून आशिल्ले. हातूंत पयले वळेरेंत 2.07 लाख युकेचे नागरीक आसात जाल्यार 1.81 लाख सयत रशियेचे नागरीक दुसरे वळेरेंत येता आनी तिसरे वळेरेंत 83,905 लाख नागरिकां सयत अमेरिकेचो नंबर लागता.
जाल्यार ओस्ट्रेलियाचे 24,401 नागरीक, कॅनडाचे 19,185, डॅनमार्काचे 6,307, फिनलॅण्डाचे 3,251, फ्रान्साचे 27,601 जर्मनीचे 42,130, ग्रीसाचे 1,213, इटलीचे 11,876, इझ्रायलाचे 24,101, जपानाचे 7,588, कझाकिस्तानचे 25,071, कुवेटाचे 420, मलेशियाचे 2,926, न्यूझिलॅण्डाचे 4,733, नेदरलॅण्डाचे 13,306, नॉर्वेंचे 4,688, पोलंडाचे 15,974, पुर्तुगालाचे 8,542, कताराचे 145, स्पेनाचे 7,844, सिंगापूराचे 3,917, स्विडनाचे 9,248, स्विझलॅण्डाचे 8,515, युएईचे 1,147, उझबेकिस्तानचे 4,816, दक्षीण कोरीयाचे 3,091 आनी हेर देशांतले 1,27 लाख नागरीक गोंयांत रावन गेल्यात.
ह्या काळा मजगतीं, विदेशी नागरीक राबितो करून आशिल्ले सुवातींचो सी फॉर्म दाखल करूंक नाशिल्ल्या कारणान 26 जाणांचेर कारवाय केल्या. तातूंतले 13 जाणांचेर खटलो चालू आसा, आठ जाण दोशी सांपडल्यात, चार जाणांची निर्दोश सुटका केल्या आनी 2 प्रकरणांची चवकशी चालू आसा.
राबितो करून आशिल्ले पर्यटक
वर्स / पर्यटक
2022 / 58,811
2023 / 1,48,095
2024 / 2,70,030
2025 / 3,05,352
2026 / 1,00,251
(आतां मेरेन)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
