भांगरभूंय | प्रतिनिधी
पणजी: गोंयांत फाटल्या पांच वर्सांत 2021 सावन सोरो पियेवन वाहन चलयिल्ल्यान 150 अपघात जाले. तातूंतल्या 62 अपघातांनी वाहन चालकाक वा प्रवाशाक मरण आयलां अशी म्हायती, मुख्यमंत्री डॉ. प्रमोद सावंत हांणी लेखी जापेंतल्यान दिली.
विरोधी पक्ष फुडारी आनी कुंकळ्ळीचे आमदार युरी आलेमांव हांणी हे संबंदीत अतारांकीत लेखी प्रस्न विचारिल्लो. ते प्रमाण, तांणी गोंयांत 2021 सावन कितले सोरो पियेवन वाहन चलयिल्ल्यान वा सवारी केल्ल्यान घडिल्ल्या अपघातांची संख्या मागिल्ली.
तशेंच तातूंत जिवघेणो आनी किरकोळ स्वरुपाच्या अपघातांचो तपशील मागिल्लो. ते प्रमाण, 2021त 5 अपघात, 2022त 79, 2023त 22, 2024त 26, 2025त 16 जाल्यार 31 जानेवारी 2026 मेरेन दोन मेळून 150 अपघात जाले. तातूंत 2021त 1, 2022त 32, 2023त 9, 2024त 14, 2025त 5 जाल्यार 31 जानेवारी 2026 मेरेन दोन मेळून 62 अपघातांनी वाहन चालकाक वा प्रवाशाक मरण आयलां.
ह्या प्रकरणांत पुलिसांनी असैमीक मरण म्हूण नोंद करून कारवाय केल्या तशेंच 2021त 4, 2022त 47, 2023त 13, 2024त 12, 2025त 11 जाल्यार 31 जानेवारी 2026 मेरेन एक मेळून 88 वाहनाचो वा किरकोळ जखमी जाल्ल्या अपघातांचो आस्पाव आसा.
ह्या प्रकरणांत पुलिसांनी अपघाताचो गुन्यांव नोंद केला अशी म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
