भांगरभूंय | प्रतिनिधी
आचारसंहितेक लागून अधिवेशनाचो समारोप दुर्दैवी
पणजी: पोटवेंचणुकेच्या आचारसंहितेक लागून अधिवेशनाचो समारोप जावप ही दुर्दैवी गजाल आसा. कलम 39 ए रद्द जावपा सयत गोंय वाटावपा खातीर आमी जो लडो सुरू केला तो सेगीत मागणी मान्य जाय मेरेन सुरूच उरतलो. आमच्यो बसका सुरूच आसात, अशें आदले न्यायाधीश फेर्दीन रिबेलो हांणी सांगलें.
जमीन रुपांतरणाची तजवीज आशिल्लें कलम 39 ए रद्द करपा सयत शेत जमनीची जतनाय करपा खातीर आदले न्यायाधीश फेर्दीन रिबेलो हांणी विधेयक तयार केलां. ह्या विधेयकाच्यो प्रती तांणी अधिवेशना पयलीं सगल्या राजकी पक्षांक धाडिल्ल्यो. विरोधी आमदारांनी शेत जमीन सांबाळपा खातीर खासगी विधेयकाची नोटीस लेगीत दिल्ली. विरोधकांनी मागणी करून लेगीत हें विधेयक चर्चेक येवंक ना. आतां अधिवेशनाचो समारोप जाल्ल्यान आतां बेगीन हें विधेयक चर्चेक लेगीत येवचें ना. तशेंच कलम 39 ए विशीं लेगीत सभाघरांत चर्चा जाली ना.
ह्या अधिवेशनांत विरोधी आमदारांनी शेतजमीन संरक्षण विधेयकाची नोटीस दिल्ली. 39 ए विशीं लेगीत चर्चेची नोटीस दिल्ली. अधिवेशनाचो समारोप जाल्ल्यान आतां हें विधेयक चर्चेक येवचें ना. पोटवेंचणूक आसून लेगीत हेर राज्यांनी विधानसभा अधिवेशन जाता. गोंयांतूच तें कित्याक तहकूब करचें पडलें? असो प्रस्न फेर्दीन रिबेलो हांणी केलो.
सभाघरांत जनतेच्या प्रस्नाचेर चर्चा जावप गरजेची आसता. आचारसंहितेंत अधिवेशना विशीं कसलोच उल्लेख नासता. पोटवेंचणूक आसतना हेर राज्यांक अधिवेशन घेवपाचेर आडखळ नासता, मात गोंयांतूच कित्याक आडखळ आयली. संसद, विधानसभा ही सर्वोच्च आसतात. वेंचणूक आचारसंहिता, न्यायालयाचे आदेश हांचो कसलोच परिणाम संसद वा विधानसभेक लागना, अशें फेर्दीन रिबेलो हांणी म्हणलें.
कलम 39 ए सयत हेर मागण्यो मान्य जाय मेरेन आमची चळवळ सुरूच उरतली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
