भांगरभूंय | प्रतिनिधी
येवजण वेगीं चालीक लावन रोखडोच बदल करपाची धिटाय मनोहर पर्रीकार हांणी दाखयली.
आदले मुख्यमंत्री, संरक्षण मंत्री मनोहर पर्रीकार हांची आयज पुण्यतीथ. गोंयांत जाल्ले दोन दिसांचे वरिश्ठ पत्रकार महासंघाचे बसकेंत पत्रकार कल्याण निधी हो मुखेल विशय आशिल्लो. तो विशय मांडटना गोंयच्या वरिश्ठ पत्रकारांक तांची याद जाली. राष्ट्रीय समान पेन्शन येवजण, पेन्शन फंडाची पत्रकारां खातीर बांदावळ केंद्र सरकारान करची ही मुखेल मागणी दोनय दीस बसकेंत जाली.
पत्रकार लोकशायेचो चौथो खांबो, सरकारी कर्मचारी न्हय हें विसरुंक जावचें ना. तांकांय कमीत कमी पूर्ण पेन्शन मेळपाकच जाय अशें देशांतल्या पत्रकारांचे बसकेच्या येवकाराच्या उलोवापांत सांगलें. 21 राज्यांतल्या पत्रकारांनी तो विशय बसकेंत मांडलो. एका तेंपार वरिश्ठ पत्रकारांनी समाजीक प्रस्नाचेर आवाज उठयिल्लो, आयज वरिश्ठां मदीं काॅम्रेडस उणे जायत आसात. पेन्शन येवजणे पासत फाटल्यान कशें लागचें पडटा तें आमकां खबर आसा. आतां प्रत्येक राज्यांतल्या पत्रकारांनी तेखातीर यत्न करचे पडटले. केंद्रीय पांवड्यार तेपासत यत्न सुरु जाल्यात, शिश्टमंडळ एखाद्रे प्रधानमंत्र्यांक मेळूंकय वतलें.
बसकेच्या दुसऱ्या दिसा पत्रकारांचें एक शिश्टमंडळ राज्यपालांक मेळूंक गेल्लें. तांचे कडेन विशय मांडटना गोंयची पत्रकार कल्याण निधी येवजण बरी आसा, ती आदल्या संरक्षण मंत्र्यांची अशी म्हायती गोंयच्या पत्रकारांन दिली.
गोंयचे येवजणेचो, हालींच पेन्शन वाडयल्या म्हणून मुख्यमंत्री, डाॅ. प्रमोद सावंत सरकाराक देशांतल्या पत्रकारांनी बसकेंत तोखणायलें.
केरळ पत्रकार पेन्शन येवजण गोंयच्या वरिश्ठ पत्रकारांनी पर्रीकार हांचे मेरेन कशी पावयली. ते येवजणेंतल्यान गोंया खातीर मात्शी वेगळी येवजण घडोवपाक पर्रीकार हांणी तेंको दिलो. निधीक मान्यताय दिली, येवजणेक आपल्या अक्षरांत फायलींत पेनान कमेंटस बरोवपी मनोहर पर्रीकार तेन्ना गोंयच्या वरिश्ठ पत्रकारांनी पळयल्यात. सरकारी अधिकारी येवजण आडावंक लागले तेन्ना आडमेळीं पयसावपाक पत्रकार आदल्या मुख्यमंत्र्यां मेरेन पावले. मुख्यमंत्र्यांनी अधिकाऱ्याक आपोवन येवजण कित्याक जाय तें समजावन सांगलें. येवजणेंतल्यान दिसाळ्यांच्या धनयांक पयस दवरपाचे यत्नय तांचेच. आदले मुख्यमंत्री पर्रीकार एका दिसाळ्याचे धनी आशिल्ले, दिसाळें बंदय पडलें. दिसाळें वेवसायीक (प्रोफेशनल) नदरेंतल्यान चलयल्यार, कुशळ संपादपी आसल्यार दिसाळीं कशीं बंद पडटलीं? एक हजार रुपयांचेर सुरू जाल्ली पत्रकार पेन्शन येवजण आयज 15 हजार रुपयांचेर पावल्या. ते खातीर तजवीज येवजणेंत आसा. मुळावे येवजणेंत आदीं रिटायर जाल्ल्या पत्रकारांक पेन्शन दिवपाची खासा तजवीज जाली. येवजण फुडें व्हरतना पत्रकार हो समाजाचो एक भाग हें गिन्यान तांकां आशिल्लें. येवजण केल्ल्या सगल्या पत्रकारांनी मतां आपल्याक, पक्षाक दिवपाक जाय हें ताणी सांगलें ना. पत्रकार आनी तांच्यो लटाफटी जाल्यो, माफी मागपय जातालें पूण दुस्मानकाय नाशिल्ली. पत्रकार कल्याण निधी येवजण अटल आसा.
दयानंद समाजीक सुरक्षा, लाडली लक्ष्मी, गृह आधार ह्यो येवजण्यो बेगीन चालीक लावपाक मनोहर पर्रीकार हांणी केल्ले यत्न कार्यकर्ते विसरुंक ना. येवजण्यांची परतून बांदावळ करपाचो हावेस सरकारान उक्तायला. लोकांच्यो सुचोवण्यो मागोवन घेवच्यो, प्लस, मायनस पाॅयंटस समजून घेवचे, एखाद्रे भौशीक बांदकाम मंत्री दिगंबरबाब कामत ते विशीं सांगूंक शकतले. तांकांय 100 टक्के यादी आसच्यो ना, पिराय वाडटना खात्यांतलीं आडमेळीं सवकासायेन पयस करुंक शिकल्यात.
लाडली, गृह आधार येवजण सुरू जाल्ली तेन्ना कितें परिस्थिती आशिल्ली? लाडली लक्ष्मीचो लाव गिरेस्तांनी, मंत्र्यांनी घेतला? ताचो अभ्यास जावचो. लाडली लक्ष्मी येवजण केली तेन्ना बोवाळ, टिका जाल्ली. येवजण हुंड्याची अशें म्हणणें मांडपी आशिल्ले. लाडली लक्ष्मीचे पयशे उच्च शिक्षणा पासत उपेगांत हाडप समा जातलें अशे विचार मांडपी लिखाण जालें. येवजण वेगीं चालीक लावन रोखडोच बदल करपाची धिटाय मनोहर पर्रीकार हांणी दाखयली. 2012 चे विधानसभा वेंचणुके वेळार लाडली लक्ष्मी येवजणेची घोशणा जाली, चार म्हयन्यांत चालीक लायतना थोमणे तांणी खाल्ले. आयज तीच येवजण बदलतना निधी वाडोवचो, लग्ना आदीं पन्नास टक्के पयशे कन्याधन म्हणून दिवचे. हे येवजणेचेर उलयतना आदले मुख्यमंत्री रवी नायक हांणी आदल्या मुख्यमंत्र्यांचेर आरोप केले, सुचोवण्यो केल्यो. आरोप कुशीक दवरून तांच्यो सुचोवण्यो मानून घेवपी मनोहर पर्रीकार विधानसभेच्या भाशणांनी दिसताले. चुको दाखयात, पर्याय दियात, सरकारी येवजण्यांचो लाव सगल्यांनी घेवचो अशें सांगपी मनोहर पर्रीकार विधानसभेंत दिसल्यात. लाडली लक्ष्मीक आदल्यो मुख्यमंत्री शशिकला काकोडकार हांचें नांव दिवचें. तीय येवजण अटल उरची.
दयानंद समाजीक सुरक्षा येवजणेची बांदावळ कशी जाली ते आदले उपमुख्यमंत्री रमाकांत खलप सांगूंक शकतले व्हय? ते येवजणेचो लाव मडगांवां चडांत चड लोकां मेरेन एका तेंपार पावोवपी भौशीक बांदकाम मंत्री दिगंबरबाब येवजणेची व्हडविकाय सांगतले. ते येवजणेंत व्हड समाजीक वावराची मोख आशिल्ली. ते येवजणेंत बदल करतना केंद्रीय निधी मेळोवपाक यत्न जावचे. गोंयचे भाग्यविधाते आदले मुख्यमंत्री भाऊंच्या नांवान केल्ली ही येवजण अटल आसा, तिका घटाय दिवची. वर्साक चडांत चड तीन यशोदामिनींचो भोवमान जावचो.
गृह आधार येवजणेंतल्यान आयज स्वयंपूर्णा, स्वयंसिद्धा घडल्यात, आपमजत गटांतल्यान कोट्याधीश अस्तुरेची मोख मुख्यमंत्र्यांनी दवरल्या. ते येवजणेचो निधी वाडोवचो, म्हारगाय वाडल्या ताचो विचार जावचो. कमी उत्पन्न गटांतल्या सरकारी कर्मचाऱ्यांक येवजण्यांचो लाव दिवपाक हरकत नासची. अटल अशे गृह आधार येवजणेचो लाव नाका आशिल्ल्यांक दिवपीय आसतले. येवजणेची परतून बांदावळ करची. येवजणी केल्ल्यो तेन्नाचो तेंप बदल्ला हें सरकाराक कळ्ळां. अटल अशे हे येवजणेक प्रेमाताई पुरव हांचें नांव कित्याक नाका? येवजणेची बांदावळ करतना ते विशीं मनोहर पर्रीकार चड चिंतूंक नाशिल्लें. ते येवजणेंतल्यान स्त्रीशक्तीक घटाय मेळ्ळ्या, तीय अटलच.
लोकांचो आवाज आयकून बांदिल्ली ही येवजण बरे तरेन फुडें वतना आडमेळीं येतात तीं पयस करपाक यंत्रणा बांदची.
कला आनी संस्कृताय खात्याच्य येवजणेंतय समाजीक सुरक्षा आसा. येवजणी चालीक लावपाक कळाक कित्याक? त्या येवजणेंत बदल जावपाक जाय. शिक्षणांतल्यान समाजीक समानताय येता तेन्ना गरज नासल्यार येवजणीचो लाव घेवप्यांनी येवजणीतलो हक्क सोडपा पासत नेमावळ आसची. आपमजत गटाचे काम वाडलां, तांकांय चड निधी मेळपाक जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
