भांगरभूंय | प्रतिनिधी
‘रुपां आनी रुपकां’ ह्या कविता समिक्षेच्या पुस्तकाची निवड
भांगरभूंय । खबरां मेज
पणजी : केंद्रीय साहित्य अकादेमीचे साहित्य पुरस्कार सोमारा 16 मार्चाक जाहीर जाले. पोरूं कांय कारणांक लागून ते जाहीर करपाची पत्रकार परिशद अचकीत रद्द केल्ली. कोंकणींत एच्चेम पेरनाळ उर्फ इग्नेशियस मेंडोसा हांच्या ‘कोंकणी काव्यें : रुपां आनी रुपकां’ ह्या कवितांचे समिक्षेच्या पुस्तका फावो जाला. 2021 त उजवाडाक आयिल्ल्या ह्या पुस्तकांत आधुनीक कोंकणी कवितां वयलो अभ्यास आनी समिक्षा आसात. ताका हाचे 2021 त कर्नाटक कोंकणी साहित्य अकादेमीचो आनी 2023 त गोवा कोंकणी अकादेमी कडल्यान ह्या पुस्तकाक उत्कृश्ट पुरस्कार फावो जाला. ह्या पुस्तकाक ज्ञानपीठ पुरस्कार जोडपी साहित्यीक दामोदर मावजो हांची प्रस्तावना आसा. मंगळुरूच्या कविता पब्लिकेशन्स हांणी हें पुस्तक उजवाडायलां.
पेरनाळ हे 1984 सावन साहित्याच्या मळाचेर आसात. 1985 च्या सुमाराक तांणी कोंकणींत लेखन सुरू केलें. युवक म्हयनाळ्या खातीर व्यंगचित्रकार म्हूण आनी उपरांत लघुकथाकार, कवी, समिक्षक, संपादक, प्रकाशक म्हूण आपली वळख निर्माण केली.
चलयांक चत्राय (1999), कायद्याच्यो कविता (2004), बामुणांचें चेडूं (2006), जनेल (2025) हे तांचे कवितासंग्रह, तर देवाक सोडल्लो पाडो (2002), बीग आनी बिगात (2016) हे तांचे कथासंग्रह. 2018 वर्सा बीग आनी बिगात खातीर तांकां विश्व कोंकणी केंद्राचो श्रीमती विमला पै उत्कश्ट पुस्तक पुरस्कार मेळिल्लो. कविता ट्रस्टाचो 2019 चो मथायस कुटूम कविता पुरस्कार तांकां फावो जाला. भाशेंतले अलंकार, प्रतिमा, प्रतीक आनी काव्यरचणूक हाचो तांणी खोलायेन अभ्यास केला.
पेरनाळ हे कन्नड आनी इंग्लीश भाशेंतूय लिखाण करतात. ते kittall.com चे संपादक आसात. तशेंच आरसो म्हयनाळ्याचे संपादक. किटल प्रकाशन ही तांची प्रकाशन संस्था. पेरनाळ हे उडुपी जिल्ह्यांतल्या पेरनाळ गांवांतले. सध्या ते मंगळुरांत रावतात. तांणी साडेसातशें परस चड कविता आनी शंबरेक लघुकथा बरयल्यात. कोंकणी भाशा आनी साहित्य प्रसारा खातीर तांणी व्हडलें योगदान दिलां. पेरनाळ हांकां हो पुरस्कार जाहीर जाल्ल्याची खबर येतकच पुराय कोंकणी भाशक साहित्यीक, साहित्य रसिकांनी तांकां परबीं भेटयलीं.
मराठी खातीर राजू बाविस्कर
‘काळ्यानिळ्या रेषा’ चित्रकार राजू बाविस्कर हांचे आपजिणेक मराठी खातीर पुरस्कार मेळ्ळा. राजहंस प्रकाशनान तें उजवाडाक हाडलां. हें पुस्तक वंचीत वर्गांतलें जगप, संघर्श आनी चित्रकलेंतल्या तांच्या प्रवासाचें विचार करपाक लावपी चित्रण करता.
हेर पुरस्कार
इंग्लीश – नवतेज सरना (क्रिमसन स्प्रींग), हिंदी- ममता कालिया (जिते जी इलाहाबाद), गुजराती- योगेश वैद्य (भातखडकी), उडिया- गिरीजाकुमार सिंह (पडापुरामा), उर्दू- प्रितपाल सिंह बेताब (सफर जारी है).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
