भांगरभूंय | प्रतिनिधी
अर्थसंकल्प मंजूर
विरोधकांक काडले भायर
ऑगस्ट – सप्टेंबरांत अधिवेशन शक्य
भांगरभूंय । प्रतिनिधी
पणजी : फोंडें विधानसभा मतदारसंघांत पोटवेंचणूक आचारसंहिता लागू जाल्ल्यान सोमारा विधानसभेचें अर्थसंकल्पीय अधिवेशन फुडले सुचोवणे मेरेन स्थगीत केलें. ह्या वेळार विरोधकांनी केल्ली लेखानुदान सादर करपाची मागणी मानून घेवंक ना. ते उपरांत विरोधी आमदारांनी सभापतीच्या हौदांत धांव घेतली. आमदार विजय सरदेसाय सोडून हेर सगल्या आमदारांक सभाघरा भायर काडले. ते उपरांत 2026- 27 च्या अर्थसंकल्पा सयत सगल्या खात्यांच्यो मागण्यो, विनियोग विधेयक मंजूर केलें. हाचे आदीं 6 मार्चाक सुरू जाल्लें अर्थसंकल्पीय अधिवेशन 27 मार्चा मेरेन जावपाचें आशिल्लें. हें अधिवेशन अर्द्याचेरूच गुठलायलें.
हे विशीं मुख्यमंत्री डॉ. प्रमोद सावंत हांणी सांगलें, लेखानुदान घेवपाक आमची हरकत नाशिल्ली, मात फोंडें पोटवेंचणुके खातीर आचार संहिता लागू जाल्या. अशा वेळार मंत्र्यांनी येवजण्यां संबंदांत अर्थीक घोशणा केल्यार आचार संहितेचो भंग जावपाक शकता. हें वेंचणुकेचें वर्स आसा. हे वेंचणुके उपरांत नगरपालिका वेंचणुकेची आचारसंहिता लागपाक शकता. अशा वेळार आतांच अर्थसंकल्प पुराय तरेन मंजूर केलो ना जाल्यार उदरगतीच्या कामांक निधी उपलब्ध जावचो ना. उदरगतीचीं कामां वेळा भितर पुराय करचे खातिरूच अर्थसंकल्प मंजूर केला.
अर्थसंकल्पाचेर उलयतना, दरेका मंत्र्याक ताच्या खात्याच्या मागण्यांचेर उलोवचें पडटा. अशा वेळार एकादी येवजण जाहीर करतात. अर्थसंकल्पांतल्यो येवजण्यो समजावन सांगतात, धोरणात्मक निर्णय घेतात. अशा वेळार लेगीत आचार संहितेचो भंग जावपाक शकता. विरोधकांक जाय जाल्यार ऑगस्ट वा सप्टेंबरांत आनीक एक अधिवेशन घेवपाक जाता. तातूंत ते आपले प्रस्न, खाजगी विधेयकां मांडपाक शकतात. आमी कोणाचेरूच अन्याय करिनात. हाचे आदीं अशे परिस्थितींत हेर राज्यांनी, केंद्र सरकारान लेगीत अर्थसंकल्प मंजूर केल्यात, अशें मुख्यमंत्र्यान सांगलें.
विरोधक खाजगी विधेयका वयल्यान सकाळ सावन नाटक करतात. आमी अर्थसंकल्प मांडून ताचेर चर्चा सुरू केल्ली. आमकां लेगीत अर्थसंकल्पाचेर पुराय चर्चा जाय आशिल्ली. मात आचार संहिता लागू करप आमच्या हातांत ना. आमी सगले समावेशक अर्थसंकल्प मांडिल्लो. आचार संहिता लागू जाल्ल्यान आपूण कसलींच अतिरिक्त आस्वासनां दिवपाक शकना. मतदारांचेर प्रभाव पडचो न्हय हे खातीर आमी चड मनान अर्थसंकल्प मंजूर करतात. अंदूं विनियोग विधेयक लोकांक समजावन सांगपाक मेळूंक ना हे खातीर आमकांय वायट दिसता, अशें मुख्यमंत्री डॉ. सावंत हांणी सांगलें.
लोकशाये खातीर योग्य न्हय : विजय
2013 त अशीच परिस्थिती उप्राशिल्ली. तेन्नाचे मुख्यमंत्री मनोहर पर्रीकार हांणी लेखानुदान घेवन अर्थसंकल्प 4 म्हयन्यां खातीर मंजूर केल्लो. ते उपरांत आमी ताचेर चर्चा केल्ली. आयज लेगीत लेखानुदान घेवंक नाशिल्ल्यान विरोधकांचेर अन्याय जाला. 23 वर्सांत पयलेच खेपे 79 टक्के अर्थसंकल्प चर्चे बगर मंजूर केला. अशें करप लोकशाये खातीर योग्य ना, अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
