भांगरभूंय | प्रतिनिधी
चर्चे बगर अर्थसंकल्प मंजूर
पणजी : फोंडें विधानसभा मतदारसंघांत वेंचणूक आचारसंहिता लागू जाल्ल्यान सोमारा विधानसभेचें अर्थसंकल्पीय अधिवेशन फुडले सुचवणे मेरेन स्थगीत केलें. ह्या वेळार विरोधकांनी केल्ली लेखनुदान सादर करपाची मागणी अमान्य केली. उपरांत विरोधी आमदारांनी सभापतींच्या हौद्यांत धांव घेतली. सभापतींनी मार्शला वरवीं विरोधी आमदारांक सभाघरा भायर काडले. उपरांत अर्थ संकल्पास सयत हेर सगल्या खात्यांच्यो मागण्यो, विनियोग विधेयक चर्चे शिवाय मंजूर केलें.
हे विशीं मुख्यमंत्र्यांनी सांगलें, लेखननुदान घेवपा विशीं आमची हरकत नाशिल्ली. मात फोंडें पोटवेंचणुके खातीर आचारसंहिता सुरू जाल्या. अशा वेळार मंत्र्यांनी येवजण्यां विशीं अर्थीक घोशणा केल्यार आचार संहितेचो भंग जावपाक शकता. हें वेंचणुकांचें वर्स. हे वेंचणुके उपरांत नगरपालिका वेंचणुकेची आचारसंहिता सुरू जावपाक शकता. अशा वेळार आतांच अर्थसंकल्प पुरायेन मंजुरी दिना जाल्यार उदरगतीच्या कामांक निधी उपलब्ध जावचो ना. उदरगतीचीं कामां वेळार पुराय करपा खातीर अर्थ संकल्प मंजूर केला.
अर्थसंकल्पाचेर उलयतना तांणी म्हणलें, दरेका मंत्र्याक तांच्या खात्याच्या मागण्यांचेर आपोवचें पडटा. अशा वेळार एकादी येवजण जाहीर करता, अर्थसंकल्पांतली येवजण समजावन सांगता, धोरणात्मक निर्णय घेतात. अशा वेळारूय आचार संहितेचो भंग जावपाक शकता. विरोधकांक जाय जाल्यार ऑगस्ट वा सप्टेंबर म्हयन्यांत आनीक एक अधिवेशन घेवपाक मेळटलें. तातूंत ते आपले प्रस्न, खाजगी विधेयकां मांडपाक शकतात. आमी आमी कोणाचेरूच अन्याय करिनात. ह्यान पयलीं अशे परिस्थितींत हेर राज्यांनी, केंद्र सरकारानूय अर्थसंकल्प मंजूर केल्यात.
विरोधक खाजगी विधेयकावेल्यान सकाळ सावन नाटक करताले. आमी अर्थसंकल्प मांडून ताचेर चर्चा सुरू केल्ली. आमकांय अर्थसंकल्पाचेर पुरायेन चर्चा जाय आशिल्ली. मात आचार संहिता लागू करप आमच्या हातांत ना. आमी पुराय समावेशक अर्थसंकल्प मांडिल्लो. आचार संहिता लागू जाल्ल्यान हांव कसलेच तरेचीं हेर आस्वासनां दिवपाक शकना. मतदारांचेर प्रभाव घालचो न्हय म्हूण आमी जड मनान अर्थसंकल्प मंजूर करतात. अंदूं विनियोग विधेयक लोकांक समजावन सांगपाक मेळूंक ना. हे विशीं आमकांय वायट दिसता,अशें मुख्यमंत्र्यांनी सांगलें.
लोकशाये खातीर योग्य ना
आमदार विजय सरदेसाय हांणी सांगलें, २०१३ वर्सा अशीच परिस्थिती जाणवल्ली. तेन्नाचे मुख्यमंत्री मनोहर पर्रीकार हांणी लेखानुदान घेवन अर्थसंकल्प ४ म्हयन्यां खातीर मंजूर केल्लो. उपरांत आमी ताचे चर्चा केल्ली. आयजूय लेखानुदान घेवंक नाशिल्ल्यान विरोधकांचेर अन्याय जाला, अशें करप लोकशाये खातीर योग्य न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
