भांगरभूंय | प्रतिनिधी
पणजीः विधानसभा अधिवेशनाचें दुसरें सप्तक विरोधकांनी बोवाळ घालून वगडायलो. सोमारा सकाळीं खाजगी विधेयकां वेल्यान विरोधकांनी परत बोवाळ करून सभापतीच्या हौदांत धांव घेतली. ह्या कोफुसांवां मजगतीं सभापतीन दोन खेपे अधिवेशन तहकूब केल्ल्यान प्रस्न आनी शुन्य काळ गुटलायलो.
अधिवशेवनाचे सुरवातेकूच आस्वासन दिवन लेगीत विधेयक मांडूंक नाशिल्ल्यान विरोधी आमदारांनी सभापतींच्या हौदांत धांव घेवन जाप मागली.
विरोधी आमदारांची १५ खाजगी विधेयकां स्थगिती प्रस्ताव मांडून घेवपाची फाटल्या शुक्ररा मागणी केल्ली. उपरांत कामकाज सल्लागार समितींत सगळी विधेयकांची वळेरी तयार जातली अशेंय आमकां आस्वासन दिल्लें. खाजगी विधिमंडळ थारावप हो आमचो हक्क, अशें आलेमांव हांणी म्हणलें.
हे विशीं मुख्यमंत्री डॉ. प्रमोद सावंत हांणी जाप दितना सांगलें, अधिवेशनाचो हो दिस खाजगी विधिमंडळ थारावपा खातीर न्हय. आयज सत्ताधारी आमदारांचे प्रस्न काळांत प्रस्न आसात म्हण सभाघराचो वेळ वगडावपाचो यत्न चल्ला.
शुक्रार हो दीस विधेयकां खातीर निश्चीत आसता. ह्या विधेयकांची तपासणी जाता म्हणसर वाट पळोवची. सोमार हो कामकाजाचो दीस. तो वगडावचो न्हय, असो उलो मुख्यमंत्र्यान मारलो.
ह्या बोवाळा मजगतीं सभापती गणेश गांवकार हांणी विधानसभा पयलीं अर्द वर स्थगीत केली. उपरांत अधिवेशन परत सुरू जातकत हीं विधेयकां केन्ना येतली असो बोवाळ विरोधकांनी सुरूच दवरले कारणान सभापतीन अधिवेशन सरळ दनपरां एक वरां मेरेन स्थगीत केलें.
अधिवेशनाचो पयलो दीस फुकट गेल्ले कारणान आमदाराक प्रस्न काळ आनी शुन्य काळा वेळार आपले प्रस्न आनी समस्या मांडपाची संद वगडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
