भांगरभूंय | प्रतिनिधी
आंदोलकांची सरकारी प्रेजेंटेशना वेळार शिटकावणी
सांगें: मिराबाग-सांवड्डें जावपी बंदार्या विशीं थळाव्या आंदोलकांनी सरकाराक दोन दिसांची मुजत दिल्या. बुधवार मेरेन बंदारो ’स्क्रॅप’ जायना जाल्यार हाचे परस व्हडलें आंदोलन करतले आनी उपरांत कितें जातलें, ताची पुराय जापसालदारकी सरकारी यंत्रणेची आसतली, अशी शिटकावणी थळाव्या आंदोलकांनी दिल्या.
नियोजीत बंदार्या आड फाटले ३३ दीस जाले सांगें, कुडचडें, सांवड्डें मतदार संघांतले लोक धरणें आंदोलन करतात. ३३ दिसांनी सरकारी यंत्रणेन बंदार्या विशीं प्रेजेंटेशन सादर केलें. शेनवारा सावड्डें श्रीस्थळ सभागृहात बंदारा प्रेजेंटेशनाची कार्यावळ जलस्त्रोत खात्यान आयोजत केल्ली. ह्या वेळार खर पुलीस बंदोबस्त केल्लो. तशेंच सांगे, कुडचडें, सावड्डें मतदार संघांतले आठशें-णवशें बंदारो विरोधी लोक, तशेंच गोंयचे कितलेशेच एनजीओ हाजीर आशिल्ले. जलस्त्रोत खात्याचे सीई ज्ञानेश्वर सालेलकार, एई अंकूश गांवकार, यसई दिलीप नायक, ईई जिब्सन मिरांडा, ईई जेसन मिनेझीस, सांगें उपजिल्हलोधिकारी मिलिंद्र वेळीप, काणकोणचे उपजिल्लोधिकारी प्रताप गांवकार, सांगेंचे मामलेदार सिद्धार्थ प्रभू, धारबांदोडें मामलेदार मनोज कोरगांवकार, काणकोणचे मामलेदार गजेश शिरोडकार आनी हेर हाजीर आशिल्ले.
लोकांनी विचारिल्ल्या प्रस्नांक जाप दिवपाक ह्या वेळार इंजिनियर हाजीर रावूंक ना. ‘आमकां नाका आमकां नाका, बंदारो आमकां नाका, आमकां न्याय जाय.’ अश्यो घोशणांय जाल्यो.
ह्या वेळार अंकूश गांवकार हांणी सांगलें, २०४७ मेरेनच्या उदकाचो अभ्यास केला. प्रेजेंटेशना वरवीं वेवस्थीत समजावन सांगलें. आयज हांगा जें घडलें तें आमी सरकारा मेरेन धाडटले.
संकेत भंडारी हांणी सांगलें, बंदारो जाले उपरांत कितें जातलें हें सविस्तर मांडलां. बदार्याक आमचो ठाम विरोध आसा. सरकारान हो बंदारो बेगोबेग स्क्रॅप करचो. अशें करिना जाल्यार आंदोलन आनीक खर जातलें. तेन्ना कायदो हातांत घेवपाक आमी फाटीं फुडें पळोवचे नात, अशी शिटकावणी तांणी दिली.
प्रदीप काकोडकार हांणी सांगलें, बंदारो बांदिनासतना, ताचे परस चड उदक कशें मेळटलें हें आमी दाखयतले. कितेंय कागदपत्रां नासतना बंदार्याचो विशय काडचो न्हय, अशें तांणी म्हणलें.
मॅश्यु डिकॉस्टा हांणी म्हणलें, बंदारो जाल्यार संगमेश्वर देवूळ पुराय बुडटलें. आतां मेरेन ६० कोटी खर्च केल्ल्याचें इंजिनियर सांगतात. हे पयशे खंय खर्च केल्यात हें सरकारान दाखोवचें.
रामा काणकोणकार हांणी सांगलें, बंदारो बांदून गांव नश्ट करपाची गरज ना. बिल्डरांक आनी कंपन्यांक उदक दिवपा खातीर ही धडपड आसा. उदक ना जाल्यार बांयो सांबाळपाक सरकारान कितें केलां?
आपा नायक हांणी बंदारो बांदल्यार गांव बुडटलो, देव बुडटले. तेन्ना तो स्क्रॅप करचो, अशें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
