भांगरभूंय | प्रतिनिधी
हॉटेलांतल्या जिनसांचें मोल वाडलें
पणजी: इझ्रायल आनी अमेरिकेन इराणाचेर हल्लो केले उपरांत आतां ह्या तीन देशां मदीं झूज चालू जालां. ताका लागून पुराय गोंयांत गॅस सिलिंडराचो उणाव जाणवपाक लागला. गोंयांत फुडले २५ दीस पावतलो इतलो सांठो आसा. देशांतूय भरपूर सांठो आसा, अशें राज्य आनी देश पांवड्या वयल्यान फुडार्यांनी सांगून पसून दरेका गांवांत गॅस सिलींडर दुकानां मुखार गिरायकांची गर्दी दिसता. वेवसायीक गॅसाचेर निर्बंध आयिल्ल्याान देशांतलीं बरींच हॉटेलां बंद दवरल्यांत, तर थोड्यांनी कांय जिनस शिजोवप बंद केलां. गोंयांत कांय कडेन चूल, लाकडां वापरून वेवसाय चालू दवरपाचो यत्न हॉटेलकारांनी केला.
गॅस सिलिंडर मेळना जाल्ल्यान बरेच लोक इंडक्शन शेगडी वापरपाक लागल्यात. फाटले कांय दीस गॅस बूक करतकच ओटीपी येनाशिल्लो. मात कालच्यान तो येवपाक लागला. घरगुती सिलिंडर २५ दिसां उपरांत मेळटलो, अशेंय सरकारा वतीन सांगलां. पूण गिरायकांच्यो रांको उण्यो जावंक ना. फ्लॅटांनी रावप्यांनी २५ ते ३० वर्सां सावन चुलीचेर रांदप सोडलां. ताका लागून गॅस सिलींडर मेळनाशिल्ल्यान ते काचाबूल जाल्यात.
जिनस म्हारग
गॅस तुटवड्याक लागून बर्याच हॉटेलांनी च्या १५ रुपयां वयल्यान २० रुपयाचेर गेल्या. १२० रुपयांक मेळपी नुस्तें रायस प्लेट १४० रुपयांचेर पावल्या. हाफ बिर्याणी १०० रुपयां वयल्यान १२० रुपयांचेर पावल्या. ताटांतले कांय जिनसूय उणे जाल्यात. पणजे सारक्या शारांत कांय हॉटेलांनी बांगडो रायसप्लेट १५० रुपयां वयल्यान १६० रुपयाचेर पावल्या.
वाळपयूय गर्दी
वाळपय प्रतिनिधीन दिल्ले म्हायती प्रमाण, गॅस सिलींडर खरेदी करपा खातीर गिरायक व्हडा प्रमाणांत गर्दी करतना दिसतात. मात सिलींडर एजन्सीच्या अधिकार्यांच्या मतान नागरिकांनी कसलोच भंय बाळगुपाची गरज नाशिल्ल्यान सिलिंडरांचो सांठो जाय तितलो आसा.
इंडियन गॅस एजन्सींत फाटल्या दोन दिसां सावन सकाळ पसून सांजेवेळार मेरेन रांकेंत उबे रावन सिलींडर घेवपाचो यत्न गिरायक करता. खुबश्या जाणांक सैरसोयीक तोंड दिवचें पडटा.
मजगतीं, हे विशीं इंडियन गॅस एजन्सीचे वेवस्थापक विलास सावंत हांचे कडेन संपर्क केलो तेन्ना तांणी सांगलें, वाळपयच्या गुदांवांत गरज आसा तितलो सिलींडरांचो सांठो उपलब्ध आसा. हाका लागून नागरिकांनी कसलेच तरेची चिंता करपाची गरज ना. कांय जाण आपली नियोजीत तारीख पुराय जावचे पयलींच सिलींडर घेवपा खातीर एजन्सीकडेन येतात. नेमां प्रमाण तारीख पुराय जाले उपरांतूच सिलेंडर मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
