भांगरभूंय | प्रतिनिधी
नागरी पुरवण खात्याच्या वरिश्ठ अधिकाऱ्याची म्हायती
गॅस वितरकांक येतात दिसाक सिलिंडरांच्यो दोन गाडयो
वेवसायीक सिलिंडर दिवपाक जाल्या सुरवात
भांगरभूंय । प्रतिनिधी
पणजी : गोंयांत गॅस सिलिंडर फावोश्या प्रमाणांत उपलब्ध आसात, पूण लोक भियेवन सिलिंडर सांठोवपा लागल्यात आनी हे खातीर ही समस्या निर्माण जाल्या. सिलिंडर वितरकांक पुरवण सेगीत चालू आसा आनी वेवसायीक सिलिंडर दिवप सुरू जालां, अशी म्हायती नागरी पुरवण खात्यांतल्या वरिश्ठ अधिकाऱ्यान दिल्या.
सिलिंडराचो फावो इतलो सांठो आसा आनी गॅस वितरकांक दिसाक 1 ते 2 सिलिंडरांच्यो गाडयो येतात. लोक भियेवन सिलिंडर घेवपा खातीर गर्दी करतात म्हूण ही समस्या निर्माण जाल्या, अशें अधिकाऱ्यान सांगलें.
वेवसायीक सिलिंडर आयज सावन दिवपाक सुरवात जाल्या. तांकां वट्ट कोटा मदलो 20 टक्के कोटा सध्या दिला. ह्या कोट्यांत ल्हवू ल्हवू वाड जातली. पुराय गोंयांत वेवसायीक आनी घरगुती दोनूय सिलिंडर उपलब्ध आसात. ह्या सिलिंडरा खातीर घरपोच सेवा लेगीत आतां सुरू जाल्या, अशें अधिकाऱ्यान सांगलें.
एचपीसीएल- कुंडय, बीपीसीएल- वेर्णा आनी आयओसीएल- बेळगांव हे तीन सिलिंडर एजन्सींतल्यान गोंयच्या वितरकांक गॅस सिलिंडरांची पुरवण जाता आनी तीन एजन्सींत फावो इतलो गॅसा सांठो आसा. गोंयांतले रिते सिलिंडर थंय भरून हाडपाचें काम वितरकांनी चालीक लायलां, अशें अधिकाऱ्यान सांगलें.
हे मजगतीं, सध्या जाल्ल्या बोवाळा खातीर गोंयांतल्या सिलिंडर वेव्हाराचेर पाळत दवरपा खातीर नागरी पुरवण खात्यान सगल्या एजन्सी कचेरेंत एक अधिकारी नेमला.
केंद्र सरकारान लागू केल्ल्या जीवनावश्यक वस्तू कायदो (एस्मा) फाटभुंयेर घरगुती गॅस सिलिंडरची पुरवण नियंत्रीत जावन ताचो दुरुपेग जावचो न्हय हे खातीर खात्यान गोंयांतल्या 53 गॅस एजन्सींनी खाशेले अधिकारी नेमल्यात. हे अधिकारी सिलिंडर पुरवणेचेर बारीक नदर दवरून सिलिंडराचो काळो बाजार वा सांठणूक जावची ना हें सुनिश्चीत करतले.
गॅस सिलिंडराची समस्या ही नाशिल्लीच. लोकांनी केल्लें कोंफुसांव आनी गॅस कंपनीची कोसळिल्ले बुकींग यंत्रणेक लागून हो सगळो घोळ जाला, अशें गिरायक समन्वय विभागाचे अध्यक्ष रोलन्ड मार्टीन्स हांणी सांगलें.
गॅस कंपनी बुकींग घेवपाक वता तेन्ना तांचो सर्वर डावन जाल्ल्या कारणान गिरायकांची गैरसोय जाली. तशेंच गॅस कंपनींनी घरा सिलिंडर पावोपाची सेवा बंद केली. घरापोच सिलिंडर सेवा हो गिरायकांचो हक्क. पूण आतां कांय पंचायती घरपोच सेवा दिवपाक लागल्यात. हें पंचायतीचें न्हय जाल्यार गॅस कंपन्यांचें काम. गिरायक 927 रुपया सिलिंडरा खातीर भरतात आनी तातूंतले 20 रुपया गिरायक हे घरपोच सेवे खातीर दितात. देखून हे पंचायती आड आमी आक्षेप घेतला, अशी म्हायती मार्टीन्स हांणी दिली.
गॅस सिलिंडर उणावाचो पर्यटनाक मार
देशभर गॅस सिलिंडराची आणीबाणी आसून लेगीत गोंयांत पर्यटक व्हड प्रमाणांत दाखल जाल्यात. पूण वेवसायीक सिलिंडरांच्या उणावाक लागून चडशीं रेस्टॉरंण्टा बंद जाल्यांत जाल्यार कांय रेस्टॉरंण्टानी मेन्यू वयले खाद्यपदार्थ उणे करून फक्त दनपारां आनी रातींचें जेवण दितात.
हे विशीं उलयतना अखील गोंय परंपरीक शॅक संघटणेचे अध्यक्ष मॅन्युएल कार्दोज हांणी सांगलें, अजून मेरेन तांकां वेवसायीक सिलिंडराची पुरवण चालू जावंक ना. सिलिंडरांचो उणाव आशिल्ल्यान शॅक धनी आपल्या कर्मचाऱ्यां खातीर जेवण चुलीचेर रांदतात. जे सिलिंडर उरल्यात ते गिरायकांक जेवण रांदपा खातीर दवरल्यात. सध्या शॅकांचेर गिरायक नाशिल्ल्यान कांय प्रमाणांत सिलिंडर उरल्यात. पूण सिलिंडर सोंपिल्ल्यान एकूय शॅक बंद जावंक ना, अशें कार्दोज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
