भांगरभूंय | प्रतिनिधी
उत्पल म्हणटा आपल्या पंगडाक मतां उणीं पडूंक नात. सत तें, मतां खूब मेळ्ळीं, जैत पयस गेलें. आदर्श जिखलो उत्पलाच्या बाबाचो.
आदले महसूलमंत्री सोमनाथ जुवारकार हांची याद आयजय ताळगांवांक आसा. पणजी म्हापालिका वेंचणुकेच्या जैता वेळार महसूलमंत्री आतानासियो मोन्सेरात (बाबुश) हांकांय ती आयल्या आसतली.
जुवारकार हांकां राजकारणांतल्यान भायर उडोवपी आदले मुख्यमंत्री मनोहर पर्रीकार हे बाबुश हांचेय आदर्श. केन्ना तांचे आड झूज दिलेंना पूण मनोहरबाब ताळगांवां रावताले. बाबूश हांकां पणजे पुलीस स्थानकाचेर ‘हल्लाबोल’ प्रकरणांत सांबाळून घेवपी मनोहरबाब कोणाक याद आसात? बाबूशाक पुलिसांनी धरून व्हेलो तेन्ना लोकप्रतिनिधी, विरोधी पक्ष मुखेली म्हणून मनोहरबाब हांणी आवाज काडलो. बाबूशाक ह्या प्रकरणा उपरांत शिक्षणमंत्रीपद मेळ्ळें. सरकार कोणाचें आशिल्लें तेन्ना? भौशीक बांदकाममंत्री दिगंबर कामत हांचें. दिगंबरबाब मनोहरबाबांचे सांगाती राजकारणांतले, बाबूशाचे आदर्श ते न्हय. बाबूशाचे आदर्श मनोहरबाब. फाटल्या कांय म्हयन्यांनी सरकारा आड जो बोवाळ जाता ताका जाप आयज पणजेकारांनीच न्हय मनोहरबाबांच्या आदर्शान दिली. पणजेचें जैत मनोहरबाबांच्या आदर्शाचें अशें म्हणल्यार अतीताय जावची ना.
पणजी म्हापालिका वेंचणूक लागीं येतना ‘भांगरभूंय’ दिसाळ्यांतल्यान तीन- चार लेख बरयल्ले. बदलपी पणजी, बदलपी राजकारणाची म्हायती त्या लेखांतल्यान दिल्ली. म्हजी जल्मभूंय, म्हजी कर्मभूंय कशी, कितली बदलल्या तें सांगतना कोणाची व्हडवीकाय मांडली ना, चुको दाखोवपाचे येत्न केले. लेखक अ ना म्हाम्ब्रे हांच्या पुस्तकांतली ती पणजी तशीच आसा व्हय? राजपाटण स्मार्ट करतना पणजेक दुखापत जाल्या, “क्लायमेट चेंज” जातना पणजी भाजतली. तेन्ना कांपाल वॉक वे थाकाय दितलो. कांपाल वॉर्डांतल्यान पणजे म्हापालिकेर वेंचून आयिल्ले कबीर पिंटो मखीजा एका तेंपार भाजपाचे युवा कार्यकर्ते. तांकांच न्हय पणजे म्हापालिकेर वेंचून येवपी चडशे वॉर्ड, वॉर्डाच्या लागसरल्या वांठाराचे, मतदारांच्या वळखीचे. म्हापालिका वेंचणूक मनोहरबाब समर्थक विरुद्ध मनोहरबाब समर्थक, विरोधक हांचे भितर जाली. बाबूश मनोहरबाबांचे दुस्मान न्हय, ते सुदारल्यात मनोहरबाबांच्या, भाजपाच्या आदर्शांतल्यान.
मॉनस्टर, मॉनस्टर म्हणून बाबूशाक जांच करपी, तांच्या रॉबीनहूड प्रतिमेचेर टिका करपी आयज भाजपा पंगडांतल्यान म्हापालिकेर वेंचून आयल्यात. बाबुश वाल्याचो वाल्मिकी जाला अशें दिसलां व्हय तांकां? मनोहरबाब हांणी बाबूशाक वाल्याचो वाल्मिकी केलो हें पणजेकारांक खबर आसा. बाबुशाक “लीडर” घडोवपाक मनोहरबाब जापसालदार. बाबूशाचे पूत रोहीत मोन्सेरात हांचो आदर्श बाबूश न्हय मनोहरबाबच म्हणून तांणी उत्पल पर्रीकाराची माफी मागली. बदलिल्ल्या वॉर्डांतल्यान जिखून येवपाची धिटाय रोहीत हाणें दाखयली. तीच धिटाय उत्पल, आम आदमी पार्टेचे वाल्मिकी नायक हांणी दाखयल्ली जाल्यारय पणजी भाजपाची उरपाची, आतांय ती भाजपाचीच उरल्या. एक व्हड चूक उत्पलान केली ती म्हळ्ळ्यार आपूण भाजपाचो, भाजपाचो म्हणून सांगत भाजपा विरुद्ध भाजपाक झुजपाक लायलें, कोंब्यांवरी.
जिखपी कोण मनोहरबाबांक आदर्श मानपी, मनोहरबाब कोणाचे? भाजपाचे, पणजेचे. पणजी भाजपाचो बालेकिल्लो, भाजपाचोच उरतलो हें जेन्ना म्हापालिका वेंचणुकेंत म्हजो पंगड ना, आसा तो भाजपाचो हें बाबूश उलयल्ले तेन्नाच कळिल्लें. उत्पल म्हणटा आपल्या पंगडाक मतां उणीं पडूंक ना. सत तें, मतां खूब मेळ्ळीं, जैत पयस गेलें. आदर्श जिखलो उत्पलाच्या बाबाचो.
मनोहरबाबांचो आदर्श घेवन म्हापालिकेर वचपी कबीर, रोहीत, दिक्षा माईणकार, वसंत आगशीकार, किशोर शास्त्री, विठ्ठल चोपडेकार, प्रसाद आमोणकार, उदय मडकयकार, शुभम चोडणकार, करण पारेख, कारोलीन पो आदीं म्हापालिकेंत वावुरिल्ले. अणभवांतल्यान जैता मेरेन पावप तांकां शक्य जालें. म्हापालिकेंत तांचो आवाज पणजेच्या फुडारा पासत म्हत्वाचो. उदय जुन्ता हावसाची काणी म्हापालिकेंत सांगतलो व्हय?
तोयार तळें, कसिनो, स्मार्ट सिटी, आझाद मैदान, कांपाल दयानंद बांदोडकार मैदानाचो हक म्हापालिकेक मेळपाक जाय. कसिनो रेगुलेटरी आॅथोरिटीची मागणी उत्पल, वाल्मिकी हांणी पत्र बरोवन सरकारा कडेन करची. उत्पलाचे बाबा वाल्मिकीच्या बाबाचे इश्ट. मनोहरबाबांक वेंचून हाडपाक वाल्मिकीच्या बाबांचो वांटो आशिल्लो. वाल्मिकी आनी उत्पल आतां एकठांय जायत व्हय? सुरेंद्र फुर्तादोक पंगडांत घेवप ही उत्पलाची व्हडली चूक. उत्पल, वाल्मिकी एक आशिल्ले जाल्यार फाटले विधानसभा वेंचणुकेंत उत्पल जैतिवंत जावपाचो. तें मतदारांनी जोखलें, चिंतलें आनी तांकां दिसलो मनोहरबाबांचो आदर्श. बाबुशाचें राजकारण दिसाचें चलता काय रातचें ? उत्पलाक कळ्ळां? सुरेंद्र कोणाचो? कांपाल तळें सांबाळ्ळां व्हय सुरेंद्रान? उत्पलाक ताईचो बंगलो दाखयला व्हय सुरेंद्रान?
मनोहरबाबांच्या मार्गदर्शनांतल्यान आयजय सरकार चलोवपी मुख्यमंत्री डॉ. प्रमोद सावंत हांकां नवी वाट पणजेचे वेंचणुकेन दाखयल्या. शाराची संस्कृताय तांकां कळ्ळ्या.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
