भांगरभूंय | प्रतिनिधी
पणजी : राज्य सरकार गोंय वैजकी महाविद्यालयांतल्या पदव्युत्तर अभ्यासक्रमांत(पीजी) एसी, एसटी आनी ओबीसी समाजां खातीर आरक्षण दिवपाक मुद्दाम कळाव करता. आरक्षण मेळप हो आमचो घटनात्मक अधिकार आशिल्ल्यान तें रोखडेंच लागू जावपाक जाय, अशी मागणी कॉंग्रेस ओबीसी विभागाचे अध्यक्ष शरद चोपडेंकार हांणी केली. शेनवारा पणजे जाल्ले पत्रकार परिशदेंत ते उलयताले. ह्या वेळार रामकृष्ण जल्मी आनी हेर पदाधिकारी हाजीर आशिल्ले.
चोपडेंकार हांणी सांगलें, देशांत हेर सुवातांचेर वैजकीय पीजी अभ्यासक्रमांत ४१ टक्के आरक्षण
दितात. मात तें गोंयांतूच दिनात. कांय वर्सां आदीं हे विशीं भंडारी समाजा वतीन उच्च न्यायालयांत याचिका दाखल केल्ली. तेन्ना सरकारान २०२०- २१ सावन अशें आरक्षण सुरू करपाचें आस्वासन दिवन याचिका फाटीं घेवपाक सांगलें. मात ताचे उपरांत आयज मेरेन आरक्षण दिवंक ना. सरकार आपूण हाचेर काम करता अशें दाखयता, मात तांकां आरक्षण दिवपाचें ना.
हो विशय सेगीत लावन धरले उपरांत जानेवारी २०२६ वर्सा जाल्ले कॅबिनेट बसकेंत आरक्षणा खातीर गरजेचें आशिल्ल्या १०० कलमी रोस्टराक मंजुरी दिल्ली. मात हे विशीं आजूनय अधिसुचवणी काडूंक ना. हांगा गरजेची आशिल्ली नेम बदलाच्या शिफारशींची फायल आजूनय गोमेकॉच्या डीन कार्यालयाकडेनूच आसा.
हाचेवेल्यान वट्ट सरकाराच्या हेतूविशीं दुबाव निर्माण जाता. येवपी एप्रील म्हयन्यांत नीट परीक्षा परत सुरू जातली. ताचे पयलीं आरक्षण मेळप गरजेचें.
त्या अधिकार्यांची चवकशी करात
आमकां अशें दिसून आयलां, ह्या संबंदीत सरकारी खात्यांतल्यो कांय अधिकारी प्रक्रिया करपाक मुद्दम वेळ लायतात. अश्या अधिकार्यांची चवकशी करून तांचेर कारवाय करची अशी मागणी चोपडेंकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
