भांगरभूंय | प्रतिनिधी
गोंयांतूच न्हय तर सगल्या राज्यांनी असो कायदो जावप गरजेचें
पणजी : गोंयच्या वकील संरक्षण विधेयकाक आमी येवकार दिला. वकिलांचे सुरक्षिततायेचे नदरेन हो कायदो जावप म्हत्वाचें. गोंय सरकाराच्या ह्या निर्णयाक आपूण येवकार दितां. गोंयांतूच न्हय तर सगल्या राज्यांनी असो कायदो जावप गरजेचें, अशें एडव्होकेट जनरल देविदास पांगम हांणी सांगलें.
वकिलांच्या सुरक्षे खातीर गोंय सरकारान वकील संरक्षण विधेयक तयार केलां. शुक्रारा मंत्रीमंडळ बसकेंत ह्या विधेयकाक मान्यताय मेळ्ळी. हें विधेयक विधानसभा अधिवेशनांत मांडटले. पांगम हांकां जेन्ना हे विशीं विचारलें तेन्ना तांणी ह्या विधेयकाक येवकार दिलो आनी वयली म्हायती दिली.
देशांतल्या सगल्या राज्यांतल्या वकिलांच्या सुरक्षे खातीर असो कायदो गरजेचो. असो कायदो करपी गोंय देशांतलें तिसरें राज्य जातलें. याचिकेची वा केशीची सुनावणी सुरू जावपाची आसतना वकिलांक मारपेट वा धमकावपाच्यो घडणुको घडल्यात, अशें पांगम हांणी सांगलें.
गोंयांतूय अश्यो घडणुको घडल्यात, आनी फाटल्या कांय दिसांनी अश्यो तीन चार घडणुको घडल्यात. हे फाटभुंयेर राज्य सरकार वकिलांच्या संरक्षणा खातीर कायदो करपाचो विचार करता जाल्यार खर्या अर्थान ही एक खर्यानीच येवकाराची गजाल. वकिलां वतीन आनी म्हजे वतीन आमी ह्या निर्णयाक येवकार दितात आनी सरकाराचे उपकार मानतात.
दोतोरांच्या संरक्षणा खातीर अशे कायदे आसात. पूण वकिलांच्या संरक्षणा खातीर पयलीं अशे कायदे नाशिल्ले. वकिलांक क्लायंट आनी विरोधी पक्ष धमक्यो दितात. तशेंच तांकां मार घालतात. गोंयांतय अश्यो घडणुको घडल्यात आनी फाटल्या कांय दिसांनी अश्यो तीन- चार घडणुको घडल्यात.
हाका लागून कायदो जावप गरजेचें आशिल्ल्याचें पांगम हांणी म्हणलें. वकील संरक्षण विधेयक विधानसभेंत मांडून संमत जावप गरजेचें आशिल्ल्याचेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
