भांगरभूंय | प्रतिनिधी
पुणे : महाराष्ट्रांतल्या टिळक विद्यापिठा वतीन पुण्याक आयोजीत ४४व्या दिक्षांत सुवाळ्यांत मुख्यमंत्री डॉ. प्रमोद सावंत हांकां मानद डी.लिट्. पद्वी भेटयली. ह्या सन्माना विशीं कृतज्ञता उक्तायतना मुख्यमंत्री सावंत हांकां हे इतिहासीक संस्थेकडल्यान मेळिल्लो भोवमान सामको अभिमानाचो खीण आशिल्ल्याचें सांगलें.
बाळ गंगाधर टिळक हांची विचारसरणी आनी राष्ट्रजागरणाच्या ध्येयांतल्यान स्थापन जाल्ल्या ह्या प्रतिश्ठीत विद्यापीठाकडल्यान मेळिल्लो सन्मान आपले जिणेंतलो म्हत्वाचो टप्पो आशिल्ल्याचें तांणी नमूद केलें.
ह्या वेळार उलयतना मुख्यमंत्री डॉ. सावंत हांणी, गोंयच्या खुबश्या मानेस्तांक ह्यान पयलीं ह्या विद्यापिठा कडल्यान हो सन्मान मेळ्ळा. तातूंत नामनेची गायिका किशोरी आमोणकार, प्रख्यात शास्त्रज्ञ रघुनाथ माशेलकार आनी अणुशास्त्रज्ञ अनिल काकोडकार हांचो आसपाव आसा. ह्या म्हान व्यक्तिमत्त्वांच्या शेजरा आपलें नांव जोडप हो सन्मान आशिल्ल्याचे तांणी सांगलें.
मुख्यमंत्री डॉ. सावंत हांणी हो भोवमान गोंयचे जनतेक समर्पीत करीत ताचो विस्वास आनी फाटबळाक लागूनच भौशीक सेवेंत आपलो प्रवास प्रेरणा दिवपी आशिल्ल्याचें तांी नमूद केलें. तशेंच आपल्या गुरूजन आनी शिक्षकांच्या मार्गदर्शनाक लागूनच जीवनमूल्ये आनी कार्याचो मार्ग घडिल्ल्याचें तांणी सांगलें.
ह्या वेळार मानद डी.लिट्. पद्वी मेळिल्ली ए. महेशकुमार रेड्डी आनी हेमंत ओबेरॉय हांकांय मुख्यमंत्री सावंत हांणी परबीं भेटयलीं.
दिक्षांत सुवाळ्यांत पद्वी घेवपी सगल्या विद्यार्थ्यांक परबीं भेटयत तांचें ज्ञान, जिद्द आनी समर्पणाक लागून देशाचो फुडार पर्जळीत जावचो, म्हणीत मुख्यमंत्र्यांनी परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
