भांगरभूंय | प्रतिनिधी
पेडणें: मालप्यां-पेडणेंच्या राष्ट्रीय महामार्ग ६६ वाठारांत घुवळे वखदां विरोधी कारवाय करून १ किलो ६३७ किलो गांजो जप्त केलो. तशेंच दोगां जाणांक अटक केली. जप्त केल्ल्या गांजाची बाजारांतली किंमत सुमार एक लाख ६४ हजार रुपया आसा. अटक केल्ले दोगूय दुबावीत चंदगड कोल्हापूर, महाराष्ट्रांतले आसात.
पेडणें पुलिसांनी दिल्ले म्हायती प्रमाण, १३ मार्चाक सांजेवेळार ७:५५ ते रातच्या ११ वरां मजगतीं मालपें, पेडणेंच्या निलिमा रेस्टॉरंट लागसार राष्ट्रीय महामार्ग ६६ रस्त्याच्या वाठारांत पुलिसांनी छापो घातलो. हे कारवाये मजगतीं दुबाविता कडेन पांचव्या रंगाचीं सुकयिल्लीं पानां, बियो आनी देंठ आशिल्लो गांजो सांपडलो. हो गांजो तांणी एम एच ०९ जिओ ९१३४ नंबराचे मारुती एर्टिगा गाडयेंत लिपोवन दवरिल्लो.
ह्या प्रकरणांत पुलिसांनी विनोद कुमार (३०, खुर्द चंदगड कोल्हापूर) आनी अतिक मलिक (२३, चंदगड कोल्हापूर) ह्या दोगांक अटक केल्या. विनोद कुमार हो वेवसायान चालक आनी अतिक हो फॅब्रिकेटर आशिल्ल्याचें समजलें. ह्या छाप्यांत १.६३७ किलो गांजो, स्काय बॅग कंपनीची निळ्या रंगाची खांद्याची बॅग, तशेंच मारुती आर्टिका कार असो मुद्देमाल जप्त केलो.
ह्या प्रकरणांत १४ मार्चाक सकाळीं २ वरांचेर पेडणें पुलीस स्टेशनांत घुवळे वखदां कायद्याचें कलम २० आनी दोन बी खाला गुन्यांव नोंद केला. खोलायेन चवकशी केली तेन्ना, अटक केल्ले दोगूय दुबावीत आंतरराज्य घुवळे वखदां वेवसायांत गुंथिल्ल्याचो दुबाव पेडणें पुलिसांनी उक्तायला.
हे विशीं पेडणें पुलीस उपनिरीक्षक प्रथमेश पार्सेकार आनी हेरांनी मेळून ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
