भांगरभूंय | प्रतिनिधी
उत्पल पर्रीकार : उण्या वेळाक लागून हार
भांगरभूंय । प्रतिनिधी
पणजी : म्हापालिका वेंचणुकेंत आयत्या वेळार बदलिल्लें आरक्षण तशेंच प्रभाग रचनेक लागून आमकां प्रचारा खातीर उणो वेळ मेळ्ळो. तरी लेगीत आमचे 3 उमेदवार जिखले. 10 प्रभागांत आमचे उमेदवार 100 परस उण्या मतांनी हारल्यात. आमकां सुमार 6 हजार मतां मेळ्ळ्यांत. हाचे मुखार लेगीत आमी लोकांचीं कामां करीत रावतले. येता ते विधानसभा वेंचणुके मेरेन आमची तयारी चालूच उरतली, अशी म्हायती उत्पल पर्रीकार हांणी दिली.
शुक्रारा पणजे घेतिल्ले पत्रकार परिशदेंत पर्रीकार हांणी सांगलें, आमच्या उमेदवारांक प्रचारा खातीर फकत 15 दीस मेळ्ळे. अशें आसून लेगीत 4 प्रभागांनी आमचे उमेदवार फकत 50 परस उण्या मतांनी हारले. अदीक वेळ मेळिल्लो जाल्यार आमचीं मतां वाडपाचीं. अशें आसलें तरीय हाचे कडेन सकारात्मक पद्दतीन पळयतात. हाचे आदीं आमच्या पॅनलाचे उमेदरा म्हापालिकेंत नाशिल्ले. आतां आमचें तीन नगरसेवक आसतले. आमकां म्हापालिकेंत एक माची मेळ्ळ्या. आमचे उरिल्ले उमेदवार हारल्यात, तरी लेगीत लोकांचे प्रस्न हातांत घेत रावतले. पणजेकारांच्या समस्यांक आमी प्राधान्य दितले. आतां आमची एक बरी फळी तयार जाल्या. आमी वेंचणुकेंत खंय उणे पडले हाचें विश्लेशण करतात. पडूंक नाशिल्लीं मतां कशीं मेळोवपाक मेळटलीं, हे विशीं विचार करतात. फाटले विधानसभा वेंचणुकेंत आपल्याक पणजे सुमार 6 हजार मतां मेळिल्लीं. आतां पणजी वाठारांत लेगीत तितलींच मतां मेळ्ळ्यांत. विधानसभा वेंचणुकेंत हीं मतां वाडोवपाचो आमचो यत्न आसतलो, अशें उत्पल पर्रीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
