भांगरभूंय | प्रतिनिधी
मुख्यमंत्र्यांनी घेतली बसका: वेवसायीक सिलींडराचें जातलें २० टक्के वांटप
पणजी : ऑनलायन पद्दतीन बुकींग केल्या उपरांत २५ दिसांनी घरगुती एलपीजी गॅस सिलींडर गोंयकारांक मेळटलो. उणावाक लागून वेवसायीक सिलींडराचें वाटप २० टक्के जातलें. उद्देगीक वापराच्या सिलींडराचेर मात बंदी आसतली, अशें मुख्यमंत्री डॉ. प्रमोद सावंत हांणी शुक्रारा स्पश्ट केलें.
इस्रायल – अमेरिका झुझाक लागून हेर राज्यां प्रमाण गोंयांत सध्या एलपीजी गॅस सिलींडराचो उणाव आसा. सिलींडर नाशिल्ल्यान हॉटेलां बंद जावपाक लागल्यांत, जाल्यार कांय हॉटेलांनी मेनुचें प्रमाण उणें केलां. हे फांटभुंयेर मुख्यमंत्री डॉ. प्रमोद सावंत हांणी शुक्रारा उचेल्या पावंड्यावेली बसका घेतली. हे बसकेक मुखेल सचिवां सयत अधिकारी तशेच ऑयल कंपन्यांचे प्रतिनिधी हाजीर आशिल्ले.
राज्यांत एलपीजी गॅसचो आवश्यक इतलो सांठो आसा. उणावाची भिरांत बाळगून लोकांनी सिलींडरा खातीर रांको लावच्यो न्हय. ऑनलायन बुकिंग केल्या उपरांत २५ दिसांनी घरगुती सिलींंडर मेळटलो, अशें मुख्यमंत्र्यांनी सांगलें. पयलींच्या कोट्याचो जो रेकॉर्ड आसा, ताचे २० टक्के वेवसायीक सिलींडरांचें वाटप जातलें. केंद्रा कडल्यान वेवसायीक एलपीजी वाटपाविशी नव्यान निर्देश आयले उपरांत ते प्रमाण कार्यवाय जातली. उद्देगीक सिलींडरांचें वांटप मात बंद जातलें, अशें मुख्यमंत्र्यांनी सांगलें.
दरेकी म्हालांत दर दिसा नागरी पुरवण खात्याचे समन्वय अधिकारी एलपीजी सिलींडर सांठ्याचो नियाळ घेतले. दर दिसा ते नागरी पुरवण खात्याच्या सचिवांक अहवाल सादर करतले. लोकांनी सहकार्य केले जाल्यार सगळ्याक एलपीजी सीलींडर उपलब्ध जातलें. जांचे कडेन दोन, तीन कनेक्शनां आसात, तांणी सिलींडरांचो सांठो करून दवरचो न्हय अशें आवाहन मुख्यमंत्री डॉ. सावंत हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
