भांगरभूंय | प्रतिनिधी
दोगांयनी ‘लव्ह जिहाद’ आनी धर्मांतराचे आरोप न्हयकारले
केरळ: प्रयागराज कुंभ मेळा सावन सोशल मिडियाचेर देशभर नामना मेळयिल्ली आनी ‘कुंभ मेळा गर्ल’ ह्या नांवान वळखपी मोनालिसा भोसले हांणी फरमान खान हाचे कडेन लग्न केलें. लग्न जाले उपरांत त्या दोगांयनी ‘लव्ह जिहाद’ आनी धर्मांतराचे आरोप न्हयकारल्यात.
केरळांत लग्न जाले उपरांत मिडिया कडेन उलयतना, सोशल मिडियाचेर पातळिल्ल्यो वावड्यो निराधार आसात. लग्न जाले उपरांत दोगांयनीय आपापलो धर्म बदलूंक ना अशें मोनालिसान स्पश्ट केलें.
दोगांयनी सांगलें, तांचे संबंद परस्पर आदर आनी समजीकायेचेर आदारून आसा. धर्म केन्नाच तांच्या लग्नाची अट नाशिल्ली. तांचें लग्न हिंदू पद्दतीन जालें आनी लग्न जावपाचो निर्णय मुखेलपणान आपणें घेतिल्ल्याचें मोनालिसान सांगलें.
आमी हिंदू रिती प्रमाण लग्न जालीं. प्रामाणीकपणान सांगपाचें जाल्यार ताका म्हजे कडेन लग्न जावपाची इत्सा नाशिल्ली, पूण हांवें आग्रो धरलो. ताका हांवें बळयां म्हजे कडेन लग्न जावपाक लायलो, अशेंय तिणें सांगलें.
ह्यान पयलीं घरच्यांचो आनीक एक लग्न प्रस्ताव हांवें न्हयकारिल्लो. म्हज्या आवय-बापायक म्हजें लग्न दुसर्या भुरग्या कडेन करून दिवपाचें आशिल्लें. म्हाका तें आवडूंक ना. तो चलो म्हज्याच कुटुंबांतलो. नात्यान तो म्हजो पयसुल्लो भाव. देखून हांवें तें करचें न्हय अशें थारायल्ल्याचें तिणें स्पश्ट केलें.
लग्न हो आमचो वयक्तीक निर्णय. ह्या लग्ना विशीं चुकीची म्हायती पातळुची न्हय अशेंय त्या दोगांयनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
