भांगरभूंय | प्रतिनिधी
मडगांव : दवंडे, फातोड्डेंचो मेगा गृहप्रकल्प आयल्यार गरजेचीआशिल्ली खंयचीच संसाधनां हांगा नात. ह्यान पयलींय ह्या प्रकल्पाक विरोध केल्लो आनी आतांय विरोध आसा. ह्या प्रकल्पाक लागून थळाव्यांच्या आडखळ्यांन वाड जातली, आग्नेलो फर्नांडिस हांणी सांगलें. ह्या प्रकल्पाक लोकांचो विरोध आशिल्ल्यान, सगल्यांचीं मतां जाणून घेवन हे विशीं भुमिका थारतली, अशें सांगलें.दवंडे, फातोड्ड्यां मेगा गृहप्रकल्पाचें काम सुरु जालां, बुधवारा थळाव्या लोकांनी एकठांय येवन ह्या प्रकल्पाक विरोध केलो. १८ वर्सां आदीं हो गृहप्रकल्प येतना ताका लोकांनी विरोध केल्लो. तेन्ना फकत ७८ ते ८० फ्लॅटांचो प्रकल्प आशिल्लो. आतां भूरुपांतर करुन हांगा सुमार ३०० फ्लॅटसांच्या गृहप्रकल्पाचें काम सुरू केलां. हो प्रकल्प थळाव्यांक नाका जाल्ल्यान तो बंद करचो, अशी मागणी लुक फर्नांडीस हांणी केली.
एसजीपीडीए आनी मडगाव पालिका हांचे कडेन प्रकल्पा विशीं म्हायतीच्या अधिकारांत अर्ज केल्लो. मात तांणी परवानो नंबर गरजेचो आशिल्ल्याचो सांगीत अर्ज भायर मारलो. प्रकल्पाचे सुवातेरूय परवानगे विशीं कसलीच म्हायती ना. प्रकल्पा विशीं पालिका मुख्याधिकार्यांची भेट घेतिल्ली. तांणी पळोवणी करपाचें आस्वासनूय दिल्लें आनी तांणी अभियंत्यांक धाडिल्ले. हाका लागून आतां परस पालिकेक जाप विचारतले, अशेंय तांणी सांगलें.
मितिल्दा रिबेलो हांणी, थळाव्यांक जाय आशिल्लो प्रकल्प जावपाची गरज आसा. प्रकल्पाक परवानगी दितना थळाव्यांक विस्वासांत घेवंक ना. ह्या प्रकल्पाक लागून थळाव्यांक आडमेळीं येवपाचीं आशिल्ल्यान हो प्रकल्प हांगा नाका अशें तिणें सांगलें.
ह्या गृहप्रकल्पांत फ्लॅटच्यो किमती ३ ते ४ कोटी इतल्यो आशिल्ल्यान हे सुवातेर फ्लॅट घेवपी हे गोंयकार नासतले. हांगा फकत मालमत्ता घेवन दवरून ते सुवातेर खंयच्यो गजाली चलतल्यो हें सांगू येना. ह्या भागांत कोयराचो, उदकाचो, घाणयार्या उदकाचो प्रस्न आसा. हातूंत आनीक वाड जातली. तशेंच थळाव्यांचे परंपरीक वेवसायाचेर परिणाम जावपाची शक्यताय आशिल्ल्याचें सांगून लोकांनी ह्या प्रकल्पाक विरोध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
