भांगरभूंय | प्रतिनिधी
पणजी : बोरयेच्या स्वामी विवेकानंद महाविद्यालयाच्या विद्यार्थी मंडळान ‘परंपरा १.० – शिवजयंती’ कार्यावळीचें आयोजन केल्लें. ‘स्वराज्य- फुडारपण आनी धाडसाचें दायज’ ह्या विशयाचेर आशिल्ली ही आंतर- महाविद्यालयीन चॅम्पियनशिप छत्रपती शिवाजी महाराजांक योग्य अभिवादन थारतली. सगळ्या महाविद्यालयांतल्या विद्यार्थ्यांक एकठांय हाडून सांस्कृतीक अभिमान, कलात्मक कुशळटाय दाखोवपाक लायली.
मुखेल अतिथी सुंदर प्रभुदेसाय, प्राचार्य (डॉ.) अच्युत पेडणेंकार हांचे उपस्थितींत सुवाळो सुरु जालो. संयोजक गायत्री बेहरे, सरचिटणीस रुद्रेश भट, संस्कृती सचिव कृतिका जामुनी आनी खेळां सचीव विवेक भारती ह्या वेळार हाजीर आसलीं. ह्या सुवाळ्या वेळार चॅम्पियनशिप ट्रॉफीचें अनावरण केलें.
भाग घेवप्यांनी वेगवेगळ्या सर्तींनी वांटो घेतलो. जातूंत सृजनशीलताय, सादरीकरण आनी शारिरीक तांक हांचो सोबीत मेळ जालो. हातूंत जायत्या भाशांतलीं एकपात्री नाटकां, युगल गायन सादरीकरणां, ‘स्वराज्याची नदर’ हाचो रचनात्मक रितीन अर्थ काडपी रेखाचित्र प्रवेश, वेशभूशा दाखोवपी मास्कॉट सादरीकरणां हांचो आस्पाव आसलो.
पीईएस जैतिवंत
खर सर्त जाल्ल्या स्वराज्य चॅम्पियनशिपींत, पोंडा एज्युकेशन सोसायटीच्या (पी. ई. एस.) रवी एस. नायक कॉलेज ऑफ आर्ट्स अँड सायन्स, फर्मागुडी हांच्या ‘प्रतापगड पंगडाक’ परंपरा 1.0 स्वराज्य चॅम्पियनशिप ट्रॉफी मेळ्ळी. उपजैतिवंतपदाचो करंड सिंहगड विद्याप्रबोधिनीन (विद्या प्रबोधिनी कॉलेज) जिखलो.
रुद्रेश भट, कृतिका जमुनी, विवेक भारती, गायत्री बेहरे आनी हेर आपसेवकांनी कार्यावळ येशस्वी करपाक मेहनत घेतली.
संचालन ऐश्वर्या नायर हांणी केलें, जाल्यार कृतिका जामुनी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
