भांगरभूंय | प्रतिनिधी
मडगांव : कोंकण रेल्वेच्या अगम्य भुप्रदेशांत पावसांत येवपी आव्हानां आनी अतिवृश्टी लक्षांत घेवन, रेल्वे ऑपरेशन्स विस्कळीत जावचीं न्हय म्हणून वर्सुकी मान्सुना पयलींची तपासणी पुराय जाली. कोंकण रेल्वेचे अध्यक्ष तशेंच वेवस्थापकीय संचालक संतोष कुमार झा हांच्या नेतृत्वाखाला पंगडा वतीन ही तपासणी जाली. मान्सुनचे फाटभूंयेर रेल्वेची मुळावी सुविधा आनी सुरक्षा वेवस्था कितली सज्ज आसा, हाचो आढावो १० आनी ११ मार्चाक झा हांच्या नेतृत्वा खाला पंगडा वतीन घेतलो.
कोंकण रेल्वेचो मार्ग दोंगरावेल्या वाठारांतल्यान गेल्ल्यान हांगा घोग्यांनी पावस पडटा. हाका लागून प्रवाशांचे सुरक्षितताये खातीर आनी रेल्वेचें वेळापत्रक सुरळीत दवरपा खातीर वर्सुकी तपासणी करतात. १० मार्चाक मडगांव (चरीसरे) ते ठोकूर ह्या विभागांची तपासणी केली, जाल्यार ११ माचारक मडगांव ते रोहा ह्या विभागांतली तांत्रीक सुविधा, रेल्वे रुळा सयत हेर गरजेची तपासणी आनी खोलायेन पळोवणी केली. ह्या आढावो दौर्यांत वेवस्थापकीय संचालक झा आनी वरिश्ठ अधिकार्यांच्या पंगडान सुरक्षिततायेचे नदरेन विवीध गजालींचो नियाळ घेतलो.
ह्या संवेदनशील सुवातांचे पळोवणी करीत रेल्वे मार्गार पालसणां कोसळपाची शक्यताय आशिल्ल्यो सुवातो आनी देंवतेंची तपासणी केली. तशेंच हांगा गरजेच्यो उपाय येवजण्योय सुचयल्यो.
मुळाव्या सुविधा मदीं रेल्वे मार्ग, पूल, बोगदे आनी सिग्नल यंत्रणेची स्थिती तपासणी केली.
रेल्वे मार्गार जे सुवातेर पावसाचें उदक सांठून उरपाचो भंय आसा, थंय केल्ल्या प्रतिबंधात्मक उपायांची तपासणी करीत उदक थंयच्यान वतलें हाची खात्री करून घेतली. तशेंच स्टेशनावेल्यो मुळाव्यो सुविधा आनी सौर ऊर्जा प्रकल्पांची कार्यक्षमतायेचीय पळोवणी केली.
सध्या सुरू आशिल्ल्या सांबाळाच्या कामांचो वेग वाडोवन पावस सुरू जावचे पयलीं सगले सुरक्षा उपाय पुराय करपाचे निर्देश ह्या वेळार दिले. हे वर्सुकी तपासणेक लागून कोंकण रेल्वेची पावसाच्या दिसांची सज्जता अधोरेखीत जाली आनी रेल्वे प्रशासन मान्सून काळांतल्या आव्हानां खातीर सज्ज जाल्ल्याचें रेल्वे प्रशासनान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
