भांगरभूंय | प्रतिनिधी
पणजी: विधानसभा अधिवेशनाचो सव्वो दीस बोवाळांत सुरू जालो. गोंय शेत जमीन राखण विधेयक खाजगी विधीमंडळ थारावांत मांडूंक नाशिल्ल्याचो आरोप करीत विरोधकांनी सभाघरांत निशेध केलो. ह्या वेळार सभापतीन 3 खेपे अधिवेशन तहकूब केलें.
शुक्रारा सकाळीं अधिवेशन सुरू जावचे पयलीं सगळे विरोधी आमदार काळे कपडे आनी तक्टे घेवन भितर सरले.
अधिवेशन सुरू जाता थंय आसा आयज खाजगी विधीमंडळ दीस आसून गोंय शेत जमीन राखण विधेयकाचो आस्पाव कामकाजांत कित्याक जावंकना अशी जाप विचारून विरोधी पक्ष फुडारी युरी आलेमांव हांणी बोवाळ केलो.
हें विधेयक मांडून टीसीपी कलम ३९ (अ) आनी १७ (२) रद्द करपाची मागणी आमची आसली. देखून आमकां हे विशीं स्पश्टीकरण जाय अशें आलेमांव हांणी सांगून हेर विरोधी आमदारां वांगडा हातांत तक्टे घेवन नेटान घोशणा दिवपाक सुरवात केली.
सभापतीन परिस्थिती नियंत्रणांत हाडपा खातीर भरपूर यत्न केले. मात आयकपाचे स्थितींत नाशिल्ल्या विरोधकांनी सभापतींच्या हौदांत धांव घेतली. सभापतीन सगळ्या विरोधी आमदारांक सभाघरा भायर काडपाचे आदेश दिले. मार्शलांनी तांकां भायर काडपाक सुरवात केली मात विरोधक अडून बसले. उपरांत सभापतींनी १० मिनटां खातीर अधिवेशन तहकूब केलें.
अधिवेशन परत सुरू जावचे पयलीं विरोधी आमदार सभाघरा भितर आयलें आनी हौदा मुखार उबें रावलें. अधिवेशन सुरू जाता तेदनाच परत बोवाळ घालपाक सुरवात केली. ह्या विशयांचेर स्पश्टीकरण दितना आपलें पयलीं आयकून घेवचें आनी मागीर उलोवचें अशी विनवणी सभापतीन केली. मात कांयच आयकपाच्या मनस्थितींत नाशिल्ल्या विरोधकांनी बोवाळ चालूच दवरलो. उपरांत सभापतीन अधिवेशन दोन वरां खातीर तहकूब केलें. सद्या विरोधी आमदार सभाघरांतूच आसात आनी फुडली रणनीती थारयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
