भांगरभूंय | प्रतिनिधी
पणजी : बिरेस्तारा विधानसभेंत डिपॉसिट रिफंड येवजणेचेर (डीआरएस) लक्षवेधी सुचवणेचेर २० मिनटां परस चड उलोवंक दिवंक नाशिल्ल्यान विरोधी आमदारांनी सभापतींच्या हौद्यात धांव घेतली. येवजणेक लागून राज्यभरचे दुकानदार, कोयर वेवस्थापक, उत्पादकांचेर परिणाम जावपाचो आशिल्ल्यान चर्चा गरजेची आशिल्ल्याचें विरोधकांनी सांगलें. हाचे उपरांत सभापतींनी हे विशीं चड वेळ उलोवपाक परवानगी दिली. मुख्यमंत्री डॉ. प्रमोद सावंत हांणी सगले भागदार, आमदारांक विस्वासांत घेवनूच ही येवजण सुरू करतले अशें स्पश्ट केलें.
मुख्यमंत्र्यांनी सांगलें, हे येवजणेक लागून सरकाराचेर कसलेच तरेचें अर्थीक चेंपण येवचेंना. येवजणेची अंमलबजावणी करपा खातीर एक वर्स लागपाक शकता. येवजणेची व्यवहार्यता तपासपा खातीर प्रदूशण नियंत्रण मंडळा वतीन अभ्यास केल्लो. तशेंच असंघटिीत कामगार, भंगार विक्रेते, हॉटेल मालक, एमआरएफ चालक हांचे वांगडा चर्चा सुरू आसा. हाका लागून नेमिल्ल्या ऑपरेटरान १४४ पंचायतीं वांगडा चर्चा केल्या. बीडीओ, अबकारी खात्यांतल्या अधिकार्यांमदीं जागृती प्रशिक्षण घेतलें.
तांणी म्हणलें, येवजण सुरू जावंक नाशिल्ल्यान आजून रिवर्स वेंडिंग मशीन (आरव्हीएम) बसोवंक ना. आरव्हीएमचो सांबाळ करपाचें काम नेमिल्ल्या ऑपरेटराचें आसतलें. सुपर मार्केट आनी हेर दुकानांत अशीं मशीनां बसोवपाक लायतले. ऑपरेटराक घराघराञनी वचून डीआरएसचा पॅकिंग उखलपाचो पर्याय तपासपाक सांगलां. हे येवजणेक लागून रस्त्या कुशीक उडोवपी कोयर उणो जातलो. तशेंच कोयराचे ब्लॅक स्पोटूय उणे जातले. कोयर समस्या उणी करपा खातीर अशे तरेच्यो येवजण्यो गरजेच्यो.
ताचे पयलीं आमदार विजय सरदेसाय हांणी हे येवजणेक लागून वेवसाय क्षेत्राचेर दर वर्सा २०० कोटी रुपये भार पडटलो अशें सांगलें. केदारनाथाक ही येवजण अपेशी थारिल्ल्याचें तांणी सांगलें. विरोधी पक्ष फुडारी युरी आलेमाव हांणी योग्य तयारी केल्या बगर येवजणेची अंमलबजावणी करची न्हय अशी मागणी केली. कार्लूस फेरेरा हांणी उत्पादक फकत गोंयां खातीरी वेगळे क्यूआर कोड आसपी लेबल करतले? असो प्रस्न केलो.
एकेच कंपनीची मक्तेदारी
आमदार व्हेन्जी व्हिएगस हांणी, हे येवजणेक लागून राज्यांतले उत्पादक, कोयर वेवस्थापक, दुकानदार, गिरायकांचेर विपरीत परिणाम जातलो. हाका लागून ह्या क्षेत्रात एकाच कंपनीची मक्तेदारी निर्माण जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
