भांगरभूंय | प्रतिनिधी
एलपीजी सीलींडर पुरवठ्याचो सरकारान घेतलो नियाळ
पणजी : आखाती देशांत सुरू आशिल्ल्या झुझाक लागून देशासयत गोंयांत एलपीजी सिलींडर गॅसाचो उणाव निर्माण जाला. राज्यांत घरगुती सिलींडर वापराचेर कसलेच निर्बंद नात. वेवसायीक गॅस सिलींडराच्या वापराचेर मात कांय प्रमाणांत निर्बंद आसात. वितरकां कडेन एलपीची सिलींडराचो फावो ते प्रमाणांत सांठो आसा. हाका लागून जनतेन भिरांत बाळगुची न्हय, अशी म्हायती मुखेल सचीव डॉ. व्ही. कांडावेलू हांणी दिली.
मुखेल सचीव डॉ. व्ही. कांडावेलू हांणी राज्यांतल्या एलपीजीच्या सांठ्याची बसका घेवन नियाळ घेतलो. बसकेक इंडियन ऑयल, हिंदुस्थान पेट्रोलीयम, भारत पेट्रोलीयम या कंपन्यांचे प्रतिनिधी हाजीर आशिल्ले. तशेंच नागरी पुरवण खात्याचे सचीव संजीव गडकार, संचालक जयंत तारी, पुलीस म्हानिरीक्षक के. आर. चौरासिया? उत्तर गोंय जिल्होधिकारी अंकीत यादव, दक्षीण गोंय जिल्होधिकारी एग्ना क्लेटस हाजीर आशिल्ले.
घरगुती गॅस सीलींडराची पुरवण सुरळीत जावपा खातीर कांय प्रमाणांत वेवसायीक सीलींडर वापराचेर निर्बंद घाल्यात. सामान्य जनतेक भिरांत बाळगुपाचें कारण ना. उपजिल्होधिकार्यावरवीं जनते मेरेन योग्य ती म्हायती पावोपाचे निर्देश दोनूय जिल्लोधिकार्यांक दिल्या. एलपीजी सीलींडगरचे वांटप करतना कंपन्यो तशेंच वितरकांंक कसलीच आडखळ येवची न्हय म्हूण पुलिसांनी फावो ते प्रमाणांत जतनाय घेवपाचे आदेश पुलीस अधिक्षकांक दिल्यात. घरगुती गॅस वापरा सयत शिक्षण संस्था, हॉस्पिटलां तशेंच संंरक्षण आस्थापनां खातीर कसलेच तरेचे निर्बंद ना. एलपीजीचो राज्यांत उणाव ना आनी लोकांनी खरेदी खातीर गर्दी करची न्हय, असो उलो सरकारान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
