भांगरभूंय | प्रतिनिधी
भांगरभूंय । प्रतिनिधी
पणजीः येरादारींत शिस्त हाडपा खातीर गोंय पुलिसांनी 2 ऑगस्ट सावन सोरो पियेवन वाहनां चलोवप्यां आड सुरू केल्ले खासा मोहिमे खाला 20 ऑगस्ट मेरेन 223 जाणां आड कारवाय केल्या.1 जानेवारी सावन आतां मेरेन सोरो पियेवन वाहना चलोवपी वट्ट 722 जाणांचेर कारवाय केल्या. येरादारी नेमाचें उल्लंघन करपा खाला दंड घालून 8 कोटी 27 लाख 50 हजार जमा केल्यात.
रस्तो अपघातांत जायते जाणांक मरण येता हाची दखल घेवन पुलिसांनी झुवारी पूला वयल्यान गाडी न्हंयेत पडून चार जाणांक आय़िल्ल्या मरणाचे घडणुके उपरांत सोरो पियेवन वाहना चलयतल्यां आड खासा मोहीस सुरू केल्ली. तशेंच वाहनां फास्ट चलोवप, हेल्मेट घालप ना, सीट बेल्टाचो वापर करप ना हाचे आड कारवाय करपाक सुरुवात केल्ली.
20 ऑगस्टाक एकाच दिसा उत्तर गोंयांत 100 जाल्यार दक्षीण गोंयांत 168 धरून राज्यांत 268 जाणांनी हेल्मेट घालूं ना म्हणून तांचेर कारवाय केली. सोरो पियेवन वाहना चलोवपी 8 जाणांचेर कारवाय केली.
येरादारी विभागान 1 जानेवारी ते 20 ऑगस्ट मेरेन हेल्मेट घालनाशिल्ल्या 72,789 दुचाकी चालकांचेर कारवाय केली. वाहनांत काळ्ये ग्लास लायिल्ले खातीर 33,465 जाणांचेर, सीट बेल्ट घालनाशिल्ल्या 3,675 जाणांचेर फास्ट वाहना चलोवपी 3,705 जाणांचेर, वाहनां चलयतना मोबायल वापरपी 1,675 जाणांचेर, लायसन्स नासतना वाहनां चलोवपी 2,156 जाणांचेर दंडात्मक कारवाय केली. तातूंतल्या सरकारी तिजोरेंत 8.27 कोटी रुपये जमा जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
