भांगरभूंय | प्रतिनिधी
पणजीः प्रधानमंत्री मत्स्य संपदा येवजण, तशेंच हेर केंद्रीय आनी राज्य सराकाराचे येवजणेचो लाव घेवन गोंयच्या नुस्तें मळावेल्या जाळवणदारांक सरकार उर्बा दिता. गोंयच्या तरणाट्यांनी नुस्तें वेवसायांत मुखार येवचें. हातूंत बरो फुडार आसा असो उलो मुख्यमंत्री डॉ. प्रमोद सावंत हांणी मारला.
नुस्तें म्हारग जाल्ल्यान गोंयचें शित, कडी आनी नुस्तें जेवप म्हणल्यार गिरेस्तां खातीर म्हारग जावन रावला. फाटल्या ८ वर्सांत बांगडे, तारले, इसवण, पापलेट, सुंगटां हें नुस्तें २५ टक्के म्हारग जाल्ल्यान सर्व सामान्यांक ह्या नुस्त्याचें मोल परवडना, अशें फातोड्डेंचे आमदार विजय सरदेसाय हांणी सांगलें.
फुडाराक अरबी दर्यांत नुस्तें दिसप म्हणल्यार व्ही.आयपी दिसपा सारकें जातलें. नुस्त्याचें हें मोल कोल्ड स्टोरेज सारकिल्लीं यंत्रणां नाशिल्ल्यान वाडपाक लागल्या. नुस्त्याची म्हारगाय नियंत्रणांत हाडपाक सरकार कितें पावलां उबारता काय? असो प्रस्न विजयान नुस्तेंमार खात्यांच मंत्री निळकंठ हळर्णकार हांकां केलो.
नुस्त्याची सांठवणूक करपाक कोल्ड स्टोरेज सामकी गरजेची, तशेंच खोल दर्यांत नुस्तेंमारी करपा खातीर २३ मिटर लांबायेच्या बोटीं परस ३०-३५ मिटर लाबायेची नुस्तेंमारीची बोट आसप गरजेचें. तशेंच नुस्तेंमार खात्यान मरीन इंजिनियर, तशेंच हेर उच्च शिक्षिताच मजतीन गोंयचें नुस्तें खातें अत्याधुनीक करप गरजेचें आसा अशी सुचोवणी विजय सरदेसाय हांणी केल्या.
हे विशीं जाप दितना नुस्तेंमार मंत्री निळकंठ हर्णकार हांणी सांगलें, मडगांव एसजीपीडए मार्केटांत नुस्तेंमार खात्यान कोल्ड स्टोरेज घातल्या. मात एसजीपीएन ही कॉल्ड स्टोरेज चालू करपाक परवानगी दिवंक ना.
तशेंच मालीम आनी कुटबण जेटीचेर कोल्ड स्टोरेज कार्यरत जाल्या. प्रधानमंत्री मत्स्य संपदा येवजणे खाला कोल्ड स्टोरेज घालपा खातीर सरकार ४० टक्के अनुदान दिता. जाल्यार एसटी लावर्थ्यांक हे खातीर ५० टक्के अनुदान मेळटा. जाल्यार खोल दर्यांत वचून नुस्तेंमारी करपा खातीर २१ जाणांक परवानगी दिल्या अशी म्हायती हळर्णकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
