भांगरभूंय | प्रतिनिधी
इराण-इस्त्रायल झुजा मजगतीं नुमालीगढ रिफायनरींतल्यान पुरवण सुरू
नवी दिल्ली: मध्यपुर्वेंत सुरू आशिल्ल्या ताणाक लागून संवसारभरांत ऊर्जा संकट निर्माण जाल्या, अशे परिस्थितींत भारतान आसामांतल्या नुमालीगढ रिफायनरींतल्यान क्रॉस-बॉर्डर पायपलायनी वरवीं बांगलादेशाक डिझेल पाठवणे सुरू केल्यात. बांगलादेश पेट्रोलियम कॉर्पोरेशन (BPC) चे अध्यक्ष मोहम्मद रेजानुर रहमान हांणी सांगलें, मंगळवार मेरेन सुमार ५,००० टन डिझेलाचो पयलो सांठो बांगलादेशांत पावला.
इराण झुजाक लागून बांगलादेशांत तेलाचें संकश्ट
सध्या बांगलादेशांत इंधनाचो खर उणाव आसा. हाचें मुखेल कारण म्हळ्यार अमेरिका- इझ्राएल-इराण झुजाक लागून संवसारीक तेलाची पुरवण खंडीत जाल्या. बांगलादेशाक सुमार ९५% इंधनाची गरज मध्य उदेंतांतल्यान आयात जाता.
‘होर्मुझ सामुद्रधुनी’ सारकिल्ल्या मार्गांनी ताण निर्माण जाल्ल्यान पुरवण खंडीत जाल्या. हाका लागून बांगलादेशांतल्या पेट्रोल पंपांचेर लांब रांक सुरू जाल्यात. सरकाराक जायत्या शारांनी तेल रेशन करचें पडलां, थंय सायकलीं खातीर १० लिटर आनी गाडयां खातीर ४० लिटराची मर्यादा थारायल्या.
आसामच्यान दिनाजपूर मेरेन पायपलायनीन पावता तेल
हें डिझेल ’भारत-बांगलादेश फ्रेंडशिप पायपलायन’वरवीं धाडटा. मार्च २०२३ वर्सा प्रधानमंत्री नरेंद्र मोदी आनी तेन्नाचे प्रधानमंत्री शेख हसीना हांणी ताचें उक्तावण केल्लें. नुमालीगढ शुध्दीकरण कारखान्यांतल्यान सुरू जावन ही पायपलायन उत्तर बांगलादेशांतल्या दिनाजपूर जिल्ह्यांतल्या पार्बातीपूर आगारांत वता. बीपीसीच्या अधिकार्यांच्या म्हणण्या प्रमाण सोमारा दनपरां ३:२० वरांचेर पंपिंग सुरू जाली. दर वराक सुमार ११३ टन तेल धाडटात, जें पुरायपणान पावपाक सुमार ४४ वरां लागतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
