भांगरभूंय | प्रतिनिधी
निरोप सुवाळ्याचेर सगल्यांच्या काळजांत खोस आनी दुख्खाची भरसण आसता खोस, अभिमान आनी दुख्खाचो स्पर्श. शिक्षणाचो हो म्हत्वाचो टप्पो पुराय केला हाची खोस, शाळेक वैभव हाडला हाचो अभिमान आनी आतां दीसपट्ट्या वेव्हाराचो भाग जावचे नात हाचें दुख्ख.
हो निरोप घेवपाचो खीण खूब म्हत्वाचो आसता. शाळा आमकां शिक्षण दिताच पूण जिणेंतल्या आव्हानांक तोंड दिवपाक तयार करता. आमी इश्ट जोडले, शिक्षक मेळयले आनी सगल्यांत म्हत्वाचें म्हणल्यार आमी स्वताक समजून घेतात आनी सुदारतात.
निरोप हो एक खीण जेन्ना भूतकाळाच्यो यादी पोसपाची आनी फुडारा खातीर सपनां विणपाची संद मेळटा. अणभवांतल्यान शिकतात आनी फुडल्या प्रवासाची तयारी करतात. जें कितें शिकलें तें फुडाराच्या जिवितांत सदांच उपेगी पडटा. निरोपा वेळार दोळ्यांतल्यान दुकां व्हांवपाक शकतात आनी निरोप दिवपाच्या वेळार काळजांत दुख्ख भरून येता, पूण हो निरोप प्रगतीचो नवो अध्याय थारता हें आमी लक्षांत दवरूंक जाय.
एक शिक्षक म्हूण शिक्षक आमकां फक्त पुस्तकी गिन्यान न्हय तर जियेवपाची कला शिकोवपाचो सदांच यत्न ताचो आसता. आमी सगल्यांनी बरी शिकवण आत्मसात करून ती आमच्या जिवितांत चालीक लावप आसता. आमी कश्टान, संघर्शान आनी बुद्धीन हांगा शिकतात. नव्या विचारांक, नव्या सपनांक जल्म दितात. ह्या पुराय प्रवासांत स्वताचेर विस्वास दवरतात आनी कश्टांतल्यान सपनां पुराय करपाचो यत्न करतात आनी कश्टांतल्यान ह्या पांवड्यार फुडें सरतात.
हांव सांगपाक सोदतां की सदांच प्रामाणीकपण, कश्ट आनी शिस्तबध्दताय आचरण करात. जिणेंत फट उलोवपाक केन्नाच आदार दिवचो न्हय. जात- पात, गरीब गिरेस्त, उंच-नीच, वा रुपाच्या आदाराचेर केन्नाच कोणा कडेन भेदभाव करचो न्हय. जिणेंत केन्नाच कोणा कडेन खंयच्याच प्रकारान भेदभाव करचो न्हय. जिवितांतल्या अन्याया आड झुजपाक सदांच शिकात. सदांच सकारात्मक विचार करात. वायट मनशा सावन पयस रावचें. कितें बरें आनी कितें चुकीचें तें सदांच समजून घेयात. एकामेकांक मान दिवचो. जिणेंत केन्नाच पयश्यांचे फाटल्यात धांवचे न्हय. तुमचे कडेन जें आसा ताचेर खोशी जावपाचो यत्न करात. जिवीत कितलेंय कठीण आसूं, केन्नाच हार मानची न्हय. आपल्या ध्येयांत थिरावन आनी कश्ट करपी फक्त येसस्वी जातात. उगडास दवरात, अपेस म्हणल्यार फक्त येसस्वीपणाची पावलाची फातर.
शाळेंत आमकां फकत शिक्षण न्हय, तर जियेवपाची कला शिकयल्या. आमी फक्त अभ्यास केल्लोच न्हय, तर समाजसेवेचीं मुल्यां, नीतीशास्त्र आनी म्हत्व समजलां. आमी खरो नागरीक म्हूण उबो रावपाची तयारी केल्या आनी हो संकल्प आमचे कडेन सदांच उरतलो.
हो नवो प्रवास सुरू करतना म्हज्या सगल्यां इश्टांक शुभेच्छा. तुमी खंय वतात थंय येस तुमच्या फाटल्यान वचूं. पूण याद दवरात, ही शाळा आमचें दुसरें घर जावन आसा. तुमचीं मुळां केन्नाच विसरूं नाकात.
म्हज्या मोगाळ इश्टांनो, हो निरोप हो शेवट न्हय, तर नव्या प्रवासाची सुरवात. तुमकां उजवाडाचो फुडार मेळचो अशी कामना करता. जेन्ना तुमकां खंयचेंय यश मेळटलें तेन्ना एकमेकाक कळयात, जाका लागून एकमेकाचे खोशयेंत आमी वांटो घेवंक शकतले.
ह्या निरोपाचेर हांव तुमकां सगल्यांक शुभेच्छा दिवन निमाणें करतां. तुमचें जिवीत सुखान भरिल्लें आसूं, तुमी तुमचीं ध्येयां साध्य करूं, तुमच्या कुटुंबाक, समाजाक, देशाक वैभव हाडूं. तुमी जिणेंत एक बरो नागरीक जावचे अशें हांव देवा कडेन मागतां.
देव बरें करूं!
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
