भांगरभूंय | प्रतिनिधी
पणजी: सोशल मिडियाच्या प्रभावाक लागून गोंयांत येवपी कांय तरणाट्यां पर्यटकां मदीं आपूण कशेय वागपाक शकतात, असो चुकीचो समज निर्माण जाला. हीं बेशिस्तपणां आतां खपोवन घेवचे ना, अशी खर शिटकावणी पर्यटन मंत्री रोहन खंवटे हांणी विधानसभा अधिवेशनांत दिली. प्रस्न- जाप काळांत उलयतना तांणी स्पश्ट केलें, पर्यटकांचे अशे वायट वागणुकेक लागून राज्याची इमेज इबाडटा, ह्यान फुडें दोशीं आड खर कायदेशीर पावलां उखलतले.
सभाघरांत म्हायती दितना, मंत्र्यांनी दर्यादेगेर कांय धक्को दिवपी प्रकारां कडेन लक्ष ओडलें. खुबशे फावटीं तरणाटे परदेशी पर्यटकां वांगडा तांचे संमती बगर सेल्फी घेवपाचो यत्न करतात. हाका लागून तांकां बरेच त्रास सोंसचे पडटात. असल्या गजालींक लागून गोंयचें नांव इबाडटा अशी चिंता तांणी उक्तायली. ह्या विशयाचेर मुख्यमंत्री डॉ. प्रमोद सावंत हांचे कडेन सविस्तर चर्चा जाल्या, दर्यादेगेर अंमलबजावणी यंत्रणां अदीक घटमूट करपाचें पावल सरकारान उबारलां.
सुरक्षिततायेचे नदरेन आतां पर्यटन पुलीस दळाची व्याप्ती वाडयतले. थळाव्या पुलीस स्टेशनांच्या समन्वयाने दर्यादेगांचेर आनीक पुलीस कर्मचारी तैनात करतले, जाका लागून पर्यटकांच्या हालचालींचेर बारकायेन लक्ष दवरपाक मेळटलें. विशेश म्हळ्यार, बायलां पर्यटकांच्या सुरक्षितते खातीर आनी देखरेखी खातीर पर्यटन पुलीस दळांत बायलां कॉन्स्टेबल्सचो आंकडो वाडोवपाच्यो सुचवण्योय दिल्यात. कायञो मोडप्यांचेर फकत दंडूच न्हय, जाल्यार गरजे प्रमाण अटक करपाचे कारवायेचे निर्देशूय विभागाक दिल्यात. गोंयची पर्यटन संस्कृती जपपा खातीर आनी पर्यटकांक सुरक्षीत वातावरण दिवपाक सरकार कसलीच तडजोड करचें ना, अशें खंवटे हांणी ह्या वेळार ठामपणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
