भांगरभूंय | प्रतिनिधी
पणजी : दिल्लीच्यान गोंयांत येवपी अकासा एअरच्या विमानांत प्रवाशान शौचालयांत विडी ओडिल्ल्याचो प्रकार उक्तो जालो. ह्या प्रकरणांत संबंदीत प्रवाशा आड गुन्यांव दाखल केला. हे घडणुकेक लागून विमानांतले प्रवासी आनी कर्मचार्यांचे सुरक्षिततायेक धोको निर्माण जाल्ल्याचें पुलिसांनी सांगलें.
हे विशीं मेळिल्ले चड म्हायती प्रमाण, दिल्लीचो आशिष नांवाचो एक प्रवासी शेनवारा अकासा एअरच्या क्यूपी१६२५ ह्या विमानान दिल्लीच्या गोंयांत प्रवास करतालो. प्रवासा मजगतीं तांणी विमानाच्या शौचालयांत विडी ओडपाचो आरोप आसा. तपासणे वेळार ताचे कडेन लायटरूय मेळ्ळो. जाका लागून विमानांतले सुरक्षीततायेक धोको निर्माण जावपाक शकता, अशें अधिकार्यांनी सांगलें.
ह्या प्रकाराची म्हायती मेळटांच विमान कर्मचार्यांनी बेगोबेग गरजेचे प्रोटोकॉल पाळून परिस्थिती नियंत्रणांत हाडली. गोंयांत मोपा विमानतळार विमान देवले उपरांत संबंदीत प्रवाशाक अधिकार्यांच्या ताब्यांत दिलो. ह्या प्रकरणांत मोपा विमानतळ पुलीस स्टेशनांत भारतीय न्याय संहिता तशेंच नागरी विमान सुरक्षितताये आड बेकायदेशीर कामां आडावपाच्या कायद्या प्रमाण गुन्यांव नोंद केला. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
