भांगरभूंय | प्रतिनिधी
पणजीः युनिटी मॉला वेल्यान सरकार आनी विरोधकां मदी मंगळार बरेंच पेटलें. युनिटी मॉल रद्द जाल्ले विशींची अधिकृत घोशणा आनी खर्चाच्या तपशीला वेल्यान विरोधकांनी बोवाळ घातलो. एकदां प्रकल्प रद्द जाले उपरांत ताचेर चर्चा करून अर्थ कितें? असो युक्तीवाद मुख्यमंत्र्यान केल्ल्यान ह्या विशयाचेर वातावरण बरेंच तापलें.
बाणावलेचे आमदार वेन्झी व्हिएगस हांणी सुरवातेक युनिटी मॉलाचो विशय काडून युनिटी मॉला विशीं फकत कागदी आदेश काडला आनी हो मॉल रद्द केल्ल्याचो मंत्रीमंडळाचो अधिकृत निर्णय सभाघरांत मांडपाची मागणी केली.
ह्या मॉला खातीर २५ कोटी मोडिल्ल्याचो दावो मुख्यमंत्र्यान केलो. मात सरकारान दिल्ले जापेंत ह्या मॉलाक आतां मेरेन २१ कोटी खर्च आयला असो आंकडो दिला. सरकार म्हणटा हो केंद्राचो प्रकल्प. मात प्रत्यक्षांत हें अनुदान आदारीत येवजण आशिल्ल्या कारणान खर्चा विशीं चिंतेची गजाल उप्रासता, अशें विरोधी पक्ष फुडारी युरी आलेमाव हांणी म्हणलें.
हे विशीं जाप दितना पर्यटन मंत्री रोहन खंवटे हांणी सांगलें, प्रभाव क्षेत्रा वेल्यान बोवाळ घालीत सुरवातेक ह्या प्रकल्पाक विरोध केलो. पर्यटन खात्याच्या अधिकार्यांनी हायड्रोलोजीस्ट सयत ह्या तळ्याचें मॅपींग केल्लें त्या वेळार दिसून आयलें, प्रकल्प प्रभाव क्षेत्राच्या ३८६ मिटर भायर येता. त्या वेळार एक वेगळी दिका थारावन आंदोलन सुरू जालें आनी त्या वेळार हातूंत राजकारण आशिल्ल्याचें सिद्ध जालें.
उपरांत तांच्या भावनांक मान दिवन युनिटी मॉल रद्द करपा विशींची म्हजी मान्यताय आशिल्लें पत्र तांकां दिलें. मात तांणी सामान्य प्रशासन खातें आनी पर्यटन खात्याचें वेगवेगळें पत्र मागलें तें लेगीत मुख्यमंत्र्यान अधिकार्यांक निर्देश दिवन तांकां दिलें. आतां कॅबिनेटाचें कारण सांगून हो मुद्यो फुडें व्हरतात, अशें खंवटे हांणी म्हणलें.
कॅबिनेटांत फकत सुवात सोदपाचो निर्णय जाल्लो आनी युनिटी मॉलाक मान्यताय दिवपाचो हो प्रशासकीय निर्णय आसलो. आतां हो मॉल दुसरे कडेन व्हरपाक सुवात सोदप चालू आसा. एकदां सुवात मेळ्ळी काय कॅबिनेटांत फकत नवे सुवातेक मान्यताय दितले आनी हो प्रकल्प थंय व्हरतले. प्रकल्पांक कॅबिनेटान मान्यताय दिवंक ना, अशें स्पश्टीकरण खंवटे हांणी दिलें.
पांच म्हयन्यांच्या काळांत युनीटी मॉलाच्या बांदकामाचेर सरकारान ७ कोटी मोडल्यात आनी ११ कोटींचे स्टील कंत्राटदारान प्रकल्पा खातीर घेवन दवरलां. ताका एकूय रुपया सरकारान स्टीलाचे फारीक करुंक ना. एकदां दुसरी सुवात निश्चीत जाले उपरांत चिंबला आशिल्लें बांदकाम सामान दुसरे सुवातेर व्हरतले, अशी म्हायती खंवटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
