भांगरभूंय | प्रतिनिधी
10 मर्चाक धपक्याक 2.24 लाख लावर्थ्यांच्या खात्यांत 45 कोटी दाखल
पणजीः म्हयन्याचो पगार येता तसो गृह आदार आनी दयानंद सामाजीक सुरक्षा येवजणेचे पयशे आतां दर म्हयन्याचे १० तारखेंक लावार्थ्यांच्या बँक खात्यांत येतलो. आयच्या दिसा १० मार्चाक गृह आदार आनी दयानंद समाजीक सुरक्षा येवजणेचे रु. ४५.२६ कोटी हे २.२४ लाखां परस चड लावर्थ्यांच्या बँक खात्यांत जमा जाल्या. हे सुविधेचो लाव घेवपा खातीर दोन म्हयन्यां भितर इनकम आनी लायफ सर्टीफिकेट सादर करप गरजेचें, असो उलो मुख्यमंत्री डॉ. प्रमोद सावंत हांणी मारला.
मुख्यमंत्री डॉ. प्रमोद सावंत हांचे हस्तुकीं वेळा भितर अर्थीक सहाय्य दिवपाचे येवजणेचें उक्तावण जालें. ह्या वेळार बायलां आनी भुरगीं उदरगत मंत्री विश्वजीत राणे, समाज कल्याण खात्याचे संचालक दिपक देसाय, बायल आनी भुरगीं उदरगत खात्याची संचालक ज्योती देसाय हजर आसली.
ह्या वेळार उलयतना मुख्यमंत्र्यान सांगलें, गृह आदार येवजणे वरवीं राज्यांतल्या सुमार २ लाख बायलांक देड हजार आनी दयानंद समाजीक सुरक्षा येवजणे वरवीं१.३० लाख जाण्ट्यांक दोन हजार इतलो लाव दितात.
लायफ प्रमाणपत्र आनी येणावळ प्रमाणपत्र ह्या दोन गाजलींक लागून हे पयशे फाटचे फुडें जातले.
मात जसो म्हयन्याचो पगार सरकारी कर्मचार्याक एक तारखे दिसा मेळटा तसोच गृह आदार आनी दयानंद सामाजीक म्हयन्याचें पेन्शन म्हयन्याचे १० तारखेक मेळटलें. ११ तारखेक बँकेंत वचून ते पयशे तुमच्यान काडपाक जाता, असो उलो मुख्यमंत्र्यान मारलो.
पयलीं लायफ प्रमाणपत्र दरेकाचो कार्यकाळ सोंपता तेन्ना दिवचें पडटालें. हे विशीं मंत्री आनी दोनय खात्याच्या संचालकां कडेन उलयलां. आतां दरेक वर्सा खातीर तुमकां येणावळ आनी लायफ प्रमाणपत्र ही गृह आदाराक दिवची पडटली. १ एप्रील ते ३० मे ह्या दोन म्हयन्यां भितर केन्नाय तुमी दिल्यार जाता, अशें मुख्यमंत्र्यान म्हणलें.
तशेंच एखादे बायलेचो घरकार बर्या कामाक लागून ताची येणावळ वाडली जाल्यार येणावळ प्रमाणमत्र दाखल करप सक्तीचें आसा. हीं दोनूय प्रमाणपत्रां दोन म्हयन्यां भितर दाखल करचो जाल्यार लावार्थ्यांचे पयशे चालू उरतले. ना जाल्यार ते आडकून उरतले, अशें मुख्यमंत्र्यान सांगलें.
जर लावर्थ्यांची कितेंय कागाळ आसत जाल्यार तांणी सामाज कल्याण खात्याचे नोडल अधिकारी रश्मी रावळ (९३२२०६६०७८) आनी भुरगीं उदरगत खात्याची समाज कल्याण अधिकारी कृतिका मांद्रेकार (९२८४२३८५००) हांकां दिल्ल्या मोबायल नंबरांचेर संपर्क करचो, असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
