भांगरभूंय | प्रतिनिधी
पणजी : पणजी महापालिका वेंचणुके खातीर फाल्यां ११ मार्चाक मतदान जातलें. मतदान सकाळीं ८ ते सांजेवेळार ५ वरां मेरेन करपाक मेळटलें. महापालिकेच्या ३० प्रभागां खातीर ६९ उमेदवारां मदीं ही वेंचणूक जातली. हातुंतल्या तेवीस प्रभागांत सरळ दोगां मदीं सर्त जातली. हेर स प्रभागांत तिगां मदीं सर्त जातली. जाल्यार प्रभाग नंबर २६ त सगल्यांत चड ५ उमेदवार लढटले. मतमेजणी १३ मार्चाक सकाळीं ८ वरां सावन श्यामा प्रसाद मुखर्जी स्टेडियमार सुरू जातली. मतमेजणी जाले उपरांत १३ मार्चाक निकाल जाहीर करतले.
महापालिका वेंचणुकेंत १५ हजार २२५ दादले जाल्यार १७ हजार २७१ बायलां मेळून वट्ट ३२ हजार ४९६ मतदारांक मतदानाचो अधिकार मेळटलो. प्रभाग नंबर ५ त सगल्यांत चड १६१७ जाल्यार प्रभाग नंबर १६त सगल्यांत उणे ८२८ मतदार आसात. तेवीस प्रभागांत भाजप समर्थक मंत्री बाबुश मोन्सेरात हांचें पॅनल आनी उत्पल पर्रीकार हांच्या ‘आमी पणजेकार’ पॅनलांत सरळ दोगां मदीं सर्त जातली. बाबुश हांच्या पॅनलान २० फेब्रुवारीक सगल्या तीस उमेदवारांचीं नांवां जाहीर केल्लीं.
आमी पणजेकार पॅनलान अर्ज फाटीं घेवपाच्या निमाण्या दिसा तीस उमेदवारांची नांवां जाहीर केल्लीं.
उमेदवारांचेर चेंपण येवचें न्हय म्हणून नांवां उसरां जाहीर केलीं, अशें आमी पणजेकार पॅनलान स्पश्ट केल्लें. प्रचार कालावधीत आमी पणजेकार पॅनला वतीन कॅसिनो संबंदीत समस्या, पार्कींग आनी शारांतल्या हेर समस्यांचेर भर दिली. जाल्यार बाबुश पॅनला वतीन फाटल्या पांच वर्सांत केल्ल्या विकास कामांचेर भर दिली. आमी पणजेकार पॅनलाक आम आदमी पक्षान जाहीर फाटबळ दिलें. जाल्यार कॉंग्रेसीच्या फुडार्यांनी ह्या पॅनलाच्या उमेदवारां खातीर घराघरांनी प्रचारांत भाग घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
