भांगरभूंय | प्रतिनिधी
नेम पाळून सुरक्षीत उतस्व मनोवपाचो मारलो उलो
मडगांव : दक्षीण गोंय पुलीस प्रशासनाकडल्यान जांबावले १० मार्चाक जावपी गुलालोत्सवा खातीरचे सुरक्षीतताये संबंदीचो आढावो घेतलो. दक्षीण गोंय पुलीस अधीक्षक संतोष देसाय हांणी जिल्ह्यांतले २५० पुलीस जाल्यार येरादारी पुलीस अधीक्षक राजेंद्र प्रभूदेसाय हांणी ३०५ येरादारी पुलीस आनी आयआरबी तैनात आसतले अशी म्हायती दिली.
दक्षीण गोंय पुलीस अधीक्षक संतोष देसाय हांणी जांबावले देेवस्थान समितीचे अध्यक्ष मंजुनाथ दुकळे हांचे सयत पत्रकार परिशद घेवन बंदोबस्ताची म्हायती दिली. देसाय हांणी सांगलें, १० मार्चाक जांबावलेच्या दामोदर देवस्थानांत गुलालोत्सव मनयतात. हे सुवातेर हजारांनी भावीक येतात. ह्या उत्सवा खातीर पांच सेक्टरांत सुमार २५० जिल्लो पुलीस विवीध सुवातांचेर तैनात करतले. देवळाचे सुवातेर तैनात करतले. देवळाचे सुवातेर आनी हेर म्हत्वाचे सुवातेर मेटल डिटॅक्टर लायतले. तशेंच चोरी आनी हेर वायट घडची न्हय म्हणून वॉच टॉवर उभारणी केल्या. गुलालाक येवपी भाविकांनी पुलिसांक सहकार्य करचें आनी सुरक्षीत उत्सव मनोवचो असो उलो मारलो.
मंजुनाथ दुकळे हांणी सांगलें, गुलालोत्सवा खातीर पुलिसांनी खर बंदोबस्त दवरला. हांगा येवपी भाविकांनी रस्त्याचेर गाडयो लावच्यो न्हय, पार्कींगाचे सुवातेर गाडयो लावच्यो. उत्सवा खातीर गुलालूच वापरचो, ते खातीर देवळांत गुलाल उपलब्ध आसतलो. देवकार्य जाले उपरांतूच गुलाल लावपाची सुरुवात करची. पालखी दर्शना खातीर गरजेचो वेळ दितले. तशेंच पालखी देवळांत घेतना गर्दी करची न्हय, त्या वेळार खेटाखेट जावपाची शक्यताय आसा. पालखी देवळांत घेतले उपरांत भाविकांक दर्शना खातीर सोडटले. पाणट्यार वतना काळजी घेवची अशेंय दुकळे हांणी सांगलें.
२२५ येरादारी पुलीस, ८० आयआरबी तैनात
दक्षीण गोंय येरादारी पुलीस अधीक्षक राजेंद्र प्रभुदेसाय हांणी पत्रकार परिशद घेवन येरादारीच्या मार्गांतलो बदल आनी पार्किंगा विशीं म्हायती दिली. प्रभुदेसाय हांणी, गुलालोत्सवा खातीर स पुलीस निरीक्षक, णव पुलीस उपनिरीक्षक, स सहाय्यक पुलीस उपनिरीक्षक हाचे सयत वट्ट २२५ येरादारी पुलीस तैनात आसतलो. तशेंच राखीव दळाचेे ८० पुलीस तैनात करतले. ह्या वेळार स सुवातांचेर पार्किंगच्यो सुवातो आशिल्ल्यान ३ हजार गाडयो आनी साडेतीन हजार दुचाकी पार्किंगची वेवस्था आसतली. गाडीचालकांक पार्किंगा खातीर पुलीस सहकार्य करतले. आपात्कालीन वेळार ग्रीन कॉरिडोर करुन ऍम्बुलन्स आनी हेर आपात्कालीन वाहनांक वाट करुन दितले, अशें प्रभुदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
