भांगरभूंय | प्रतिनिधी
केंद्रा खातीर अतिरिक्त ५० एकर सुवात दिवपाची मुख्यमंत्र्यांची घोशणा
पणजी : धारगळच्या अखिल भारतीय आयुर्वेद संस्थेंत कॅन्सर संशोधन केंद्र स्थापन करतले. हे खातीर ५० एकर अतिरिक्त सुवात दितले, अशी घोशणा मुख्यमंत्री डॉ. प्रमोद सावंत हांणी केली. धारगळेच्या अ. भा. आयुर्वेद संस्थेंत सुश्रूत शस्त्रक्रीया, भौतीक उपचार अशा सेवांचें उक्तावण केलें. ह्या वेळार आयुश मंत्रालयाचे केंद्रीय राज्यमंत्री प्रतापराव जाधव हाजीर आशिल्ले.
अखिल भारतीय आयुर्वेद संस्थेंतल्या १०० पदवीपूर्व सुवातां मदल्यो ५०% सुवातो गोंयच्या विद्यार्थ्यां खातीर राखीव दवरल्यात. अखिल भारतीय आयुर्वेद संस्था आधुनीक भलायकी सेवे वांगडा परंपरीक वखदांचे पद्धतींक उर्बा दिवपा खातीर वचनबद्ध आसा. हे संस्थेंत ह्या सुविधांच्या उक्तावणाक लागून दुयेतींचे सेवेंत मात्शी वाड जातली आनी लोकां खातीर विशेश आयुर्वेदीक उपचारांची उपलब्धताय वाडटली, अशें मुख्यमंत्री डॉ. प्रमोद सावंत हांणी म्हणलें. आयुर्वेदाचो लाव सगल्याक पावोवपा खातीर केंद्र सरकार बांदिल आसा, अशें केंद्रीय आयुश राज्यमंत्री प्रतापराव जाधव हांणी म्हणलें.
प्रधानमंत्री नरेंद्र मोदी हांच्या नेतृत्त्वा खाला, आयुष मंत्रालय देशभरांतली आयुर्वेद मुळावी सुविधा घटमूट करपा खातीर सेगीत यत्न करता अशें तांणी म्हणलें. अखील भारतीय आयुर्वेद संस्थेंतल्या नव्या सुविधांक लागून सर्वांगीण भलायकी सेवा वाटपाक फाटबळ मेळटलें आनी एकात्मीक उपचार पद्धतीं वरवीं दुयेतींक लाव मेळटलो, असो विस्वास तांणी उक्तायलो.
ह्या वेळार मुख्यमंत्री प्रमोद सावंत हांणी कॅन्सर संशोधन केंद्र, केंद्रीय संशोधन प्रयोगशाळा, वखदां निर्माण सुविधा आनी हेर सुविधां खातीर अखिल भारतीय आयुर्वेद संस्थेच्या गोंय कॅम्पसाचो विस्तार करपाची घोशणां केली. वैद्य राजेश कोटेचा, सचीव, आयुष मंत्रालय हांणी आयुर्वेदाक मेळपी वाडपी संवसारीक मान्यतायेचेर उजेड घालो.
आयुर्वेद संस्था, गोंय आयुर्वेद शिक्षण, संशोधन आनी रुग्णसेवा घटमूट करपाक म्हत्वाची भुमिका करता. हे संस्थेंत ह्या नव्या सुविधांची भर पडिल्ल्यान संस्थेची विशेश भलायकी सेवा दिवपाची तांक अदीक वाडले तशेंच पुराव्यां आदारीत आयुर्वेद आनी समन्वित वैद्यकशास्त्राक चालीक लागतले. अखिल भारतीय आयुर्वेद संस्थेचे, प्रा. पी. के. प्रजापती हांचें भाशण जालें.
ह्या वेळार फुडल्या सेवांचें उक्तावण जालें: सुश्रुत शस्त्रक्रिया कक्ष संकुल आयुर्वेदीय शस्त्रक्रिया आनी रुग्णसेवा अदीक खर करपा खातीर तयार केल्ली आधुनिक शस्त्रक्रिया सुविधा.
भौतीक उपचार विभाग, शरिरीक उपचार आनी पुनर्वसनाची गरज आशिल्ल्या दुयेतीं खातीर उपचार आनी पुनर्वसन सेवा दिवपा खातीर सुसज्ज.
कौमारभृत्य पंचकर्म विभाग भुरग्यां खातीर पंचकर्म उपचारांचेर केंद्रित विशेष विभाग, आयुर्वेदावरवीं सर्वांगीण बाल भलायकी सेवेक उर्बा दितले.
बीएमडी (हाडांच्या खनिज घनतेचे मापन) विभाग हाडांच्या भलायकेचें मुल्यांकन आनी वेवस्थापन सुलभ करपाक स्थापन केल्लो विभाग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
