भांगरभूंय | प्रतिनिधी
संवसारीक बायलां दिसा निमतान मुख्यमंत्र्या वतीन ‘चेक्ड बाय दोतोर’ मोहिमेची घोशणा
पणजी : संवसारीक बायलां दिसा निमतान गोंयांत ४० वर्सां पिराये वयल्या बायलां खातीर ‘चेक्ड बाय दोतोर’ ही खाशेली मोहीम सुरू जातली. ४० वर्सां पिराये वयल्या बायलां खातीर सगळ्या भलायकी केंद्रां सयत गोंय वैजकी म्हाविद्यालयांत पुराय शरिराची फुकट तपासणी जातली. दरेकी म्हालांतल्या एका खासगी हॉस्पिलांतूय सवलतीच्या दरांत सगले तरेच्यो तपासण्यो जातल्यो. मुख्यमंत्री डॉ. प्रमोद सावंत हांणी संवसारीक बायलां दिसा निमतान हे मोहीमेची घोशणा केल्या. संवसारांतल्या हेर वाठारां सयत गोंयांत लेगीत आयतारा संवसारीक बायलां दीस मनयलो. पणजे सयत हेर वाठारांत विंगड विंगड कार्यावळी जाल्यो.
संवसारीक बायलां दिसा निमतान मुख्यमंत्री डॉ. प्रमोद सावंत हांणी गोंयांतल्या समेस्त बायलांक परबीं दिलीं. बायल मनीस सेगीत कुटुंबाचे भलायकेची जतनाय घेता. हें करतना स्वताचे भलायके कडेन तिची आडनदर जाता. बायलांनी आपले भलायकेची जतनाय घेवची, असो उलो मुख्यमंत्री डॉ. प्रमोद सावंत हांणी ह्या वेळार केलो. भलायके खातीर ‘चेक्ड बाय दोतोर’ ही मोहीम गोंयांत सुरू जाता. राज्यांतल्या मुळाव्या भलायकी केंद्र (पीएचसी), सामूदायीक भलायकी केंद्र (सीएचसी), जिल्हो हॉस्पिटल आनी गोंय वैजकी म्हाविद्यालय हॉस्पिटलांत ४० वर्सां परस चड पिरायेच्या बायलांच्यो सगल्यो चाचण्यो फुकट जातल्यो. हे मोहीमेचो सगल्या बायलांनी लाव घेवचो. तशेंच मणिपाल सारकिल्ल्या खासगी हॉस्पिटलांत लेगीत सवलतीच्या दरांत तपासणी जातली. दरेकी म्हालांत एका खासगी हॉस्पिटलाची सवलतीच्या दरांत चाचणी करपा खातीर वेवस्था आसतली. ह्या तपासण्यां खातीर ८ ते १० हजार रूपया खर्च येतात. खासगी हॉस्पिटलांत हाचे परस उण्या सवलतीच्या दरांत तपासणेची वेवस्था जातली, अशें मुख्यमंत्री डॉ. प्रमोद सावंत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
