भांगरभूंय | प्रतिनिधी
मडगाव : आकें बायशचे सरपंच फ्लोरियानो फर्नांडीस हे जिल्लो पंचायत वांगडी जाल्ल्यान प्रभाग नंबर सत पोटवेंचणूक आयतारा शांतिकायेन जाली. ह्या वेळार आंतानिओ वाझ आनी प्रदीप वेर्लेकार ह्या दोगांय मदीं सरळ पेटिल्ल्यान वेर्लेकार हांणी भाजपान फाटबळ दाखयलां.
आकें बायशचे सरपंच आशिल्ले फ्लोरियानो फर्नांडीस हांणी जिल्लो पंचायतीची वेंचणूक लढिल्ली आनी कॉंग्रेसीचे तिकेटीचेर ते वेंचणुकेक देंवल्यात. जिल्लो पंचायत वांगडी जाल्ल्यान फर्नांडीस हांणी पंच वांगड्यांचो राजिनामो दिल्लो. हाका लागून रितो जाल्लो आकें बांयश पंचायतीच्या प्रभाग नंबर स खातीर आयतारा पोटवेंचणूक घेतली. ही पोटवेंचणूक घाटमरड आकें, बांयशच्या सरकारी मुळाव्या विद्यालयांतल्या मतदान केंद्राचेर घेतली. सकाळ सावन सुरु जाल्ले वेंचणुकेक मतदारांचो व्हड प्रतिसाद मेळूंक ना. फाटले वेंचणुकेंतूय ह्या प्रभागांतल्यान सुमार अडेजशें मतदान जाल्लें. हे फावटींय दोनशेंच्या लागींलागीं मतदान जातलें, असो अंदमास उमेदवारांनी उक्तायला.
ह्या वेळार कॉंग्रेसीचे जिल्लो पंचायत वांगडी फर्नांडीस हांचे सयत सिध्देश भगत हांणी आंतानिओ वाझ हांकां फाटबळ दाखयलें. जाल्यार आमदार उल्हास तुयेंकार हांचे सयत भाजप कार्यकर्त्यांनी प्रदीप वेर्लेकार हांकां फाटबळ दिलां. पंचायत वेंचणुको ह्या पक्षाचे तिकेटीचेर जरी नासले तरी भाजप आनी कॉंग्रेस कार्यकर्त्यांचो सक्रीय वाटो दिसून आयलो. आंतानिओ वाझ आनी प्रदीप वेर्लेकार ह्या दोगांयनी वेंचून येवपाक विस्वास उक्तायलो. वेर्लेकार हांणी सांगलें, ह्यान पयलीं आपणें वेंचणूक लढयिल्ली तेन्ना फकत चार मतांनी हारिल्लों. आतां भाजपाचें फाटबळ आशिल्ल्यान ते जिखतले अशें सांगलें.
जाल्यार वाझ हांणी, आपूण पयलेच फावटीं वेंचणूक लढयतां. हांगचे मतदार आपल्याक कामाची संद दितले अशें तांणी सांगलें.
सिध्देश भगत हांणी, पंचायतीची पोटवेंचणूक जरी आसली तरी आमदारूय स्वता हें वेंचणुके खातीर हाजीर आशिल्ले. आमी लोकांक केंद्रस्थानी दवरून काम केल्ल्यान आमी फाटबळ दिल्लो उमेदवार वेंचून येतलो, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
